Nga Redaksia – Një ngjarje historike ka ndodhur për AfD-në në Gjermani. Për herë të parë një politikan i kësaj force merr drejtimin e një parlamenti rajonal gjerman, duke shënuar një tjetër thyerje të barrierave politike ndaj partisë që prej vitesh ndodhet në qendër të debatit për të djathtën ekstreme në vend.
Politikani i AfD-së, Tobias Rausch, është zgjedhur kryetar i Parlamentit të landit të Saksoni-Anhaltit, duke u bërë politikani i parë i kësaj partie që merr një post të tillë në një parlament rajonal gjerman.
35-vjeçari mori 48 nga 82 votat e deputetëve në seancën konstituive të parlamentit në Magdeburg. Rezultati tregon se Rausch nuk është mbështetur vetëm nga grupi parlamentar i AfD-së, por ka marrë vota edhe nga deputetë të forcave të tjera politike.
Dyshimet janë përqendruar veçanërisht te deputetë të CDU-së, të cilët mund të kenë votuar për kandidatin e AfD-së. Megjithatë, kjo nuk mund të përcaktohet me saktësi, pasi votimi ishte i fshehtë.
Pas zgjedhjes, Rausch premtoi se do ta ushtrojë detyrën në mënyrë të paanshme. Ai deklaroi se do të jetë “president i të gjithë parlamentit të Saksoni-Anhaltit”, dhe jo përfaqësues vetëm i partisë së tij.
Një post me peshë në politikën gjermane
Kryetari i Landtagut ka një rol të rëndësishëm në funksionimin e parlamentit rajonal. Ai drejton seancat parlamentare, garanton respektimin e rregullave dhe rendit gjatë punimeve dhe ushtron kompetenca të rëndësishme administrative mbi institucionin.
Për AfD-në, marrja e këtij posti përbën një moment politik me rëndësi të veçantë.
Partia fitoi zgjedhjet rajonale të 6 shtatorit me 43,8 për qind të votave, duke u renditur forcë e parë, por pa arritur shumicën absolute për të qeverisur e vetme.
Në Saksoni-Anhalt, AfD klasifikohet nga Shërbimi për Mbrojtjen e Kushtetutës si organizatë e konfirmuar e ekstremit të djathtë. Pikërisht për këtë arsye, zgjedhja e Rauschit merr një peshë edhe më të madhe në debatin politik gjerman.
AfD synon edhe drejtimin e qeverisë
Por ambiciet e AfD-së në Saksoni-Anhalt nuk përfundojnë me drejtimin e parlamentit.
Zgjedhja e kryeministrit të ri të landit pritet të zhvillohet në muajin dhjetor. AfD ka paralajmëruar se kandidati i saj, Ulrich Siegmund, do të synojë të sigurojë shumicën e nevojshme për formimin e qeverisë.
Problemi është se edhe Siegmundit i duhen vota nga deputetë të partive të tjera.
Kjo e vendos politikën gjermane përballë një tjetër prove: a do të vazhdojë izolimi politik i AfD-së, apo rezultati i zgjedhjeve dhe ndryshimi i ekuilibrave në parlament do t’i hapë rrugë kësaj force edhe drejt pushtetit ekzekutiv?
Zgjedhja e Tobias Rauschit tregon se AfD ka kaluar tashmë një tjetër prag politik. Për herë të parë, një përfaqësues i saj është ulur në krye të një parlamenti rajonal gjerman.
Dhe dhjetori mund të jetë prova e radhës.
© Copyright of PatriotikMedia.al
