Nga Redaksia – Arrestimi në Francë i biznesmenit Ermal Beqiraj, i shpallur në kërkim ndërkombëtar nga SPAK dhe i akuzuar si një nga personazhet kyç në dosjen e AKSHI-t, ka rikthyer në qendër të vëmendjes një nga çështjet më të bujshme të korrupsionit dhe tenderëve publikë në Shqipëri. Ndërsa autoritetet shqiptare kërkojnë ekstradimin e tij për t’u përballur me drejtësinë, rrethanat e arrestimit në territorin francez, si dhe fakti se kompani të lidhura me të vijonin të përfitonin pagesa nga buxheti i shtetit, kanë ngritur pikëpyetje të forta mbi funksionimin e institucioneve shqiptare.
Sipas Policisë së Shtetit, Beqiraj u arrestua në qytetin e Amiens pas bashkëpunimit mes Interpol Tiranës dhe Interpol Lion. Të martën, më 29 korrik, ai pritet të dalë para Gjykatës Penale të Amiens, ku do t’i komunikohet zyrtarisht kërkimi ndërkombëtar dhe do të nisin procedurat për ekstradimin drejt Shqipërisë.
Gjykata e Posaçme kundër Korrupsionit dhe Krimit të Organizuar (GJKKO) i ka caktuar masën e sigurisë “arrest në burg” për veprat penale “Heqja e paligjshme e lirisë”, “Konkurrenca e paligjshme nëpërmjet dhunës”, “Shkelja e barazisë së pjesëmarrësve në tendera apo ankande publike”, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal” si dhe “Pastrimi i produkteve të veprës penale”.
Fluturimi mbi centralin bërthamor që alarmoi Francën
Arrestimi i tij ndodhi pas një episodi që alarmoi autoritetet franceze. Sipas mediave franceze, Beqiraj po pilotonte një avion të vogël që fluturoi mbi termocentralin bërthamor Penly në Seine-Maritime, një objekt strategjik ku po ndërtohen edhe dy reaktorë të rinj bërthamorë të teknologjisë EPR-2.
Gjatë fluturimit, avioni zbriti nga rreth 3,700 në 3,500 këmbë, nën kufirin minimal të lejuar për këtë zonë të ndjeshme. Si pasojë, Forcat Ajrore dhe të Hapësirës të Francës ngritën një avion ushtarak që e shoqëroi deri në aeroportin Albert në rajonin Somme, ku Beqiraj u arrestua menjëherë sapo preku pistën.
Dëshmia dhe pajisjet AirTag
Gjatë kontrollit fizik, autoritetet franceze gjetën në rrobat e tij tre pajisje AirTag, gjurmues GPS të prodhuar nga Apple, të cilat janë sekuestruar si prova. Sipas mediave franceze, kjo ka shtuar dyshimet e hetuesve se fluturimi mund të mos ketë qenë një veprim i rastësishëm.
Vetë Beqiraj deklaroi se ulja e lartësisë së fluturimit ishte një gabim dhe se në momentin kur kaloi mbi centralin bërthamor ishte duke folur në telefon me nënën e tij. Megjithatë, itinerari i tij – nga Alberti drejt Calais, më pas mbi Brittany dhe përfundimisht mbi Penly – nuk i bindi autoritetet franceze.
Për shkeljen e rregullave të fluturimit ai u dënua me kusht dhe me një gjobë prej 7,000 eurosh, përpara se t’i dorëzohej Zyrës Qendrore Franceze për Luftimin e Krimit të Organizuar (OCLCO), e cila nisi procedurat për ekstradimin e tij drejt Shqipërisë.
Akuzat e SPAK dhe pasuritë e sekuestruara
Beqiraj është pronar i kompanisë “Soft & Solutions” dhe akuzohet nga SPAK se, në bashkëpunim me persona të tjerë, ka përfituar tenderë publikë me vlerë dhjetëra milionë euro përmes kërcënimeve ndaj kompanive rivale në dosjen e AKSHI-t.
Autoritetet shqiptare kanë sekuestruar 10 pasuri dhe të gjitha llogaritë bankare në emër të tij. Mes tyre përfshihen prona në resortin “Green Coast” në Vlorë, apartamente dhe njësi shërbimi në Tiranë e Golem, kompani tregtare, automjete, motomjete, si dhe jahti luksoz “Predator 50 Skyfall”, me vlerë rreth 1 milion euro, i regjistruar në emër të një punonjëseje të kompanisë “Soft & Solutions”.
Sipas legjislacionit shqiptar, Ermal Beqiraj prezumohet i pafajshëm deri në një vendim gjyqësor të formës së prerë.
Paradoksi i pagesave nga shteti
Ndërsa Beqiraj rezultonte i shpallur në kërkim ndërkombëtar dhe arrestohej në Francë, dokumente financiare tregojnë se pagesat nga institucionet shqiptare drejt kompanive të lidhura me të nuk ishin ndërprerë.
Sipas të dhënave të publikuara, Këshilli i Lartë Gjyqësor rezulton t’i ketë transferuar kompanisë “Horizon” shumën prej 10,958,400 lekësh më 30 qershor 2026, në kuadër të kontratës për ngritjen e platformës informatike Enterprise Service Bus (ESB), e fituar nga bashkimi i operatorëve “Soft & Solution” dhe “Horizon”.
Ky fakt ngre një debat publik mbi mënyrën se si funksionojnë kontratat shtetërore kur një nga përfituesit rezulton i kërkuar nga drejtësia. Nga njëra anë, SPAK kërkon arrestimin e biznesmenit për akuza të rënda që lidhen me grup të strukturuar kriminal, pastrim parash dhe manipulim tenderësh; nga ana tjetër, kontratat publike dhe pagesat ndaj operatorëve ekonomikë të lidhur me të rezultojnë të kenë vijuar.
Mbetet për t’u parë nëse organet kompetente do të japin sqarime mbi procedurat e ndjekura dhe nëse do të ketë verifikime të mëtejshme mbi administrimin e fondeve publike në këtë rast, ndërsa procesi i ekstradimit të Ermal Beqirajt drejt Shqipërisë pritet të vijojë në ditët në vazhdim.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
