Nga Redaksia – Marrëdhëniet mes Shteteve të Bashkuara dhe Gjykatës Penale Ndërkombëtare (ICC/GJPN) po hyjnë në një fazë të re tensioni. Sekretari amerikan i Shtetit, Marco Rubio, ka deklaruar se administrata amerikane do të intensifikojë përpjekjet kundër gjykatës me seli në Hagë, duke e akuzuar atë se po cenon sovranitetin e SHBA-së.
Në një video-mesazh të publikuar në platformën X, Rubio u shpreh se, sipas administratës amerikane, sfida ndaj SHBA-së nuk zhvillohet me armë apo raketa, por përmes ligjeve, traktateve dhe përdorimit të së drejtës ndërkombëtare.
Në një opinion të botuar nga Wall Street Journal, Rubio argumenton se Uashingtoni synon të kufizojë aftësinë e Gjykatës Penale Ndërkombëtare për të ushtruar juridiksion ndaj ushtarakëve dhe zyrtarëve amerikanë, duke theksuar se administrata e konsideron këtë si një çështje të mbrojtjes së sovranitetit kombëtar.
Gjykata Penale Ndërkombëtare, e themeluar në vitin 1998 dhe me seli në Hagë, ka mandat të hetojë dhe gjykojë krime të rënda ndërkombëtare, përfshirë gjenocidin, krimet e luftës dhe krimet kundër njerëzimit. Ndër vendimet më të bujshme të saj është edhe lëshimi i një urdhër-arresti ndaj presidentit rus Vladimir Putin.
Aktualisht, më shumë se 120 shtete janë palë në Statutin e Romës që themeloi GJPN-në, përfshirë Gjermaninë. Megjithatë, Shtetet e Bashkuara dhe Izraeli nuk e njohin juridiksionin e kësaj gjykate.
Tensionet mes Uashingtonit dhe GJPN-së janë shtuar pas rikthimit të Donald Trump në Shtëpinë e Bardhë. Administrata amerikane vendosi sanksione ndaj kryeprokurorit Karim Khan dhe disa gjyqtarëve të gjykatës, pasi ICC lëshoi urdhër-arreste ndaj kryeministrit izraelit Benjamin Netanyahu dhe ish-ministrit të Mbrojtjes Yoav Gallant.
Nga ana tjetër, tre prej gjyqtarëve të sanksionuar kanë njoftuar se do të ndërmarrin veprime ligjore kundër SHBA-së, duke argumentuar se masat e vendosura ndaj tyre, përfshirë ndalimin e hyrjes në territorin amerikan, janë të pajustifikuara.
Përplasja mes Uashingtonit dhe Gjykatës Penale Ndërkombëtare pritet të ndikojë në debatin ndërkombëtar mbi kufijtë e juridiksionit të institucioneve ndërkombëtare dhe balancën mes drejtësisë ndërkombëtare dhe sovranitetit të shteteve.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
