Faqja me 8,1 milionë ndjekës publikon artikull për protestat në Tiranë dhe kërkesën për largimin e Edi Ramës …

Nga Redaksia – Një faqe në Facebook me 8,1 milionë ndjekës, e emërtuar “Donald Trump for President”, ka publikuar një artikull në gjuhën angleze për protestat në Shqipëri, përplasjet mes studentëve dhe policisë në Tiranë dhe kërkesat për dorëheqjen e kryeministrit Edi Rama.

Me titullin “Tirana shpërthen, studentët shqiptarë përballen me policinë për të gjashtën ditë, duke kërkuar largimin e kryeministrit socialist Edi Rama”, publikimi i kushton vëmendje situatës politike në Shqipëri dhe pakënaqësisë së protestuesve ndaj qeverisë.

Artikulli përmend akuzat për korrupsion, kostot e larta të arsimit, mungesën e vendeve të punës dhe emigrimin e të rinjve. Një pjesë e rëndësishme i kushtohet edhe projektit të resortit luksoz bregdetar të lidhur me Jared Kushner dhe kompaninë e tij Affinity Partners.

Postimi i plotë nga titulli origjinal:

Tirana shpërthen, studentët shqiptarë përballen me policinë për të gjashtën ditë, duke kërkuar largimin e kryeministrit socialist Edi Rama

Për të gjashtën ditë radhazi, kryeqyteti i Shqipërisë është përfshirë nga përplasje të dhunshme, ndërsa protestuesit e udhëhequr nga studentët përleshen me policinë e ndërhyrjes, u vënë flakën mbetjeve dhe kërkojnë dorëheqjen e kryeministrit Edi Rama. Trazirat, të nxitura nga muaj të tërë zemërimi për korrupsionin, kostot gjithnjë e më të larta të arsimit, mungesën e vendeve të punës dhe një marrëveshje për një resort luksoz bregdetar të lidhur me Jared Kushner, janë përhapur përtej Tiranës. Turma protestuesish kanë hedhur gurë, kanë djegur barrikada dhe janë përleshur me forcat e policisë të pozicionuara pas rreshtave të automjeteve të blinduara.

Njësitë e policisë kundër trazirave kanë përdorur gaz lotsjellës, topa uji, plumba gome dhe granata trullosëse kundër demonstruesve që kanë hedhur gurë, kokteje Molotov dhe fishekzjarrë. Ndërtesat qeveritare, bankat dhe infrastruktura rrugore janë dëmtuar. Policia raporton qindra të plagosur nga të dyja palët dhe qindra arrestime që prej mesit të javës, kur dhuna u përshkallëzua. Dyqanet kanë mbyllur qepenat për t’u mbrojtur. Punonjësit e bashkisë kanë hequr gurët e trotuareve. Seancat parlamentare janë anuluar, ndërsa jeta në kryeqytet është paralizuar.

Rama, kreu i Partisë Socialiste, në pushtet që prej vitit 2013 dhe i zgjedhur së fundmi për një mandat të katërt, ka refuzuar të japë dorëheqjen.

Ne nuk do t’i nënshtrohemi dhunës”, deklaroi ai.

Në videomesazhet e tij, Rama ka fajësuar një “dorë të huaj” dhe ka këmbëngulur se trazirat “nuk kanë absolutisht asnjë lidhje me vështirësitë, problemet apo aspiratat legjitime” të shqiptarëve të zakonshëm. Ai e ka paraqitur zgjedhjen si një alternativë mes anëtarësimit në Bashkimin Europian në periudhën 2028–2030 dhe kaosit: “A e duan këtë, apo duan BE-në?” Qeveria e tij mohon ekzistencën e korrupsionit sistemik, ndërsa ofron vetëm bisedime të kufizuara për tarifat e shkollimit.

Protestuesit e kundërshtojnë këtë paraqitje të situatës. Një 19-vjeçar i quajtur Enea u tha gazetarëve se qeveria “po na çon në kufijtë e durimit” dhe se mesazhi i tij për Ramën është i thjeshtë: “Të japë dorëheqjen sa më shpejt të jetë e mundur, përpara se gjithçka të marrë flakë.”

Një tjetër studente, Lora, deklaroi: “Ky është një revolucion. Jemi lodhur nga protestat paqësore. Nuk do të ndalemi derisa Rama të japë dorëheqjen.”

Turmat brohorasin “Rama, jep dorëheqjen!” përpara Ministrisë së Arsimit dhe zyrës së kryeministrit. Organizatorët dhe pjesëmarrësit përshkruajnë muaj të tërë marshimesh paqësore të shpërfillura nga autoritetet, të cilat nisën si “Revolucioni i Flamingove”, kundër shitjes së ligatinave të mbrojtura bregdetare, ku jetojnë flamingot dhe kafshë të tjera të egra, për ndërtimin e një kompleksi luksoz me vlerë shumë miliardë dollarë, të mbështetur nga kompania Affinity Partners e Jared Kushner. Rama e ka mbështetur fuqimisht projektin, duke e paraqitur si pjesë të modernizimit të vendit.

Protestat nxjerrin në pah dështime më të thella gjatë më shumë se një dekade të qeverisjes socialiste: kostot e larta të arsimit me pak përfitime, emigrimin e të rinjve dhe perceptimin se elitat politike bëjnë marrëveshje në interes të tyre, ndërsa shqiptarët e zakonshëm përballen me mundësi të kufizuara dhe mungesë perspektive.

Qeveria e Ramës i ka paraqitur aktet e dhunës si vepër të personave të jashtëm dhe kundërshtarëve politikë, në vend që t’i trajtojë ato si një përballje reale me bilancin e saj qeverisës.

Bizneset kanë bërë thirrje për qetësi, ndërsa dëmet po përhapen. Përplasja nuk tregon ende asnjë shenjë të menjëhershme qetësimi.

© Copyright of PatriotikMedia.al