Nga Gent Progni:
Prej disa vitesh, Bashkimi Evropian ka ngritur vazhdimisht në raportet e saj shqetësime serioze për mënyrën se si menaxhohen sistemet digjitale dhe tenderët publikë të teknologjisë në Shqipëri. Çështje që dikur trajtoheshin si problematika teknike apo administrative, sot po konsiderohen pjesë e sigurisë kombëtare dhe asaj euroatlantike.
Në fokus të kritikave kanë qenë:
- mungesa e transparencës në tenderët IT,
- procedurat me konkurrencë të kufizuar,
- centralizimi i sistemeve shtetërore,
- mbrojtja e të dhënave personale,
- auditimi i kontratave teknologjike,
- si dhe kapacitetet reale të administratës digjitale shqiptare.
Pas sulmeve kibernetike që goditën Shqipërinë gjatë viteve 2022–2023, alarmi u ngrit edhe më lart. Sulmet ndaj platformave shtetërore treguan se infrastruktura digjitale nuk është thjesht çështje serverash apo software-sh, por një hallkë kritike e sigurisë së shtetit.
Në këtë panoramë, AKSHI është futur natyrshëm në radarët e partnerëve ndërkombëtarë, pasi administron pjesën më të madhe të platformave dhe sistemeve qeveritare në vend.
Burime dhe analiza të ndryshme kanë ngritur pikëpyetje mbi:
- mënyrën e dhënies së kontratave,
- varësinë nga kompani të caktuara,
- mungesën e kontrollit të pavarur,
- dhe nivelin real të mbrojtjes së sistemeve shtetërore.
Për NATO dhe partnerët perëndimorë, siguria kibernetike tashmë është pjesë e sigurisë strategjike. Çdo dobësi në sistemet shtetërore të një vendi anëtar apo partner shihet si rrezik potencial jo vetëm lokal, por edhe rajonal.
Nëse deri dje kritikat kalonin në heshtje, sot klima duket ndryshe. Pas precedentëve të fundit në Europë dhe rritjes së luftës hibride, çdo problem me infrastrukturën digjitale shtetërore po shihet me lupë nga institucionet ndërkombëtare.
Dhe pikërisht këtu lind pyetja që shumëkush po e bën: a ka Shqipëria realisht një sistem digjital të sigurt dhe të mbikëqyrur siç duhet, apo gjithçka mbahet mbi propagandë dhe fasadë teknologjike?
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.