Protesta, slogane dhe heshtje për Ligjin nr. 21/2024: Kujt i intereson të mos flitet për shfuqizimin e tij
Nga Redi Minga:
Prej 2 muajsh, mijëra qytetarë dalin në protesta duke kërkuar ndryshim politik. Në sheshe dëgjohen vazhdimisht thirrje si: “Rama ka rënë”, “Rama ka mbaruar”, “Rama në burg” apo “Berisha në burg”. Por mes zhurmës së sloganeve politike mungon pothuajse tërësisht një kërkesë konkrete që lidhet drejtpërdrejt me legjislacionin: shfuqizimi i Ligjit nr. 21/2024.
Kjo ngre një pyetje që shumë qytetarë e konsiderojnë të natyrshme:
Pse shfuqizimi i Ligjit nr. 21/2024 nuk dëgjohet më si një kërkesë e përditshme e protestës?
Ligji nr. 21/2024, që ndryshoi ligjin “Për zonat e mbrojtura”, u miratua nga Kuvendi në shkurt 2024 dhe u dekretua nga Presidenti Bajram Begaj në mars të po atij viti. Që prej miratimit, ai është shoqëruar me kritika nga organizata mjedisore, ekspertë dhe aktorë të ndryshëm publikë. Një pjesë e dispozitave të tij janë kundërshtuar edhe në Gjykatën Kushtetuese si dhe nga BE.
Megjithatë, pavarësisht debatit të gjerë, as mazhoranca dhe as opozita nuk duket se e kanë vendosur shfuqizimin e këtij ligji në qendër të agjendës së tyre politike.
Kjo mungesë veprimi ngre pikëpyetje serioze.
Nëse Kryeministri Edi Rama është i bindur se ligji është në interes të vendit, përse nuk u përgjigjet publikisht kritikave të ekspertëve dhe organizatave që e kundërshtojnë?
Nëse Sali Berisha e konsideron këtë ligj të dëmshëm, përse nuk ka ndërmarrë një nismë të qartë politike dhe parlamentare për shfuqizimin e tij?
Po drejtuesit e forcave të tjera politike, si Adriatik Lapaj, Agron Shehaj dhe Arlind Qori, përse nuk e kanë kthyer këtë çështje në një kauzë të përbashkët, nëse e konsiderojnë ligjin problematik?
Edhe protesta po ngre pikëpyetje.
Nëse synimi i tyre është ndryshimi i politikave dhe jo vetëm ndryshimi i pushtetit, atëherë përse nuk dëgjohet vazhdimisht kërkesa për shfuqizimin e një ligji që ka shkaktuar kaq shumë debat publik?
Përse sloganet politike dominojnë çdo protestë, ndërsa kërkesat konkrete ligjore mbeten në plan të dytë?
Përse nuk luftohet fortë në protestë kërkesa për shfuqizimin e Ligjit nr. 21/2024?
Këto pyetje burojnë nga një fakt i dukshëm: deri më sot nuk ka pasur një nismë të përbashkët dhe të qëndrueshme politike për shfuqizimin e këtij ligji, pavarësisht kritikave që ai ka marrë.
Pikërisht kjo heshtje ushqen dyshime dhe kërkon shpjegime. Qytetarët kanë të drejtë të pyesin nëse bëhet fjalë për mungesë vullneti politik, për prioritete të tjera, apo për një mirëkuptim të heshtur që askush nuk dëshiron ta sqarojë publikisht.
Në një demokraci, përgjegjësia për të dhënë llogari nuk i takon vetëm qeverisë. Edhe opozita, partitë e reja dhe organizatorët e protestave duhet të shpjegojnë pse një çështje që konsiderohet kaq e rëndësishme nga shumë qytetarë nuk është shndërruar në një kërkesë të përhershme politike dhe parlamentare.
Nëse protesta synon ndryshime konkrete dhe jo vetëm largimin e establishmentit politik, atëherë qytetarët kanë të drejtë të presin objektiva të qarta, kërkesa të matshme dhe iniciativa ligjore që shkojnë përtej sloganeve.
Apo drejtuesit e protestës janë duke pritur veprimet e SPAK-ut që mbulon dallaveret e Ramës, me shumë zhurmë dhe asgjë në dritë.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
