Nga Redaksia – Një mënyrë e pazakontë dhe e diskutueshme e ekspozimit të veshjeve dhe sendeve personale të heroit kombëtar Çerçiz Topulli në Muzeun e Kalasë së Gjirokastrës ka shkaktuar reagime të forta nga publiku dhe specialistë të trashëgimisë kulturore.
Në qendër të polemikës u vendos manekini i përdorur për të paraqitur veshjet e Çerçiz Topullit, i cili shoqërohej me një portret që shumë qytetarë e konsideruan të papërshtatshëm dhe aspak dinjitoz për figurën që përfaqëson.
Dhe këtu nuk bëhet fjalë thjesht për një çështje estetike.
Çerçiz Topulli (1880–1915), i lindur në Gjirokastër dhe i vrarë në Shkodër, është një nga figurat e njohura të Rilindjes Kombëtare Shqiptare. Ai iu përkushtua çështjes kombëtare dhe luftës për pavarësinë e Shqipërisë, duke mbetur në kujtesën historike si një nga figurat simbol të patriotizmit dhe qëndresës shqiptare.
Pikërisht për këtë arsye, mënyra se si një figurë e tillë paraqitet në një institucion muzeal nuk mund të trajtohet si një detaj i parëndësishëm.
Një hero kombëtar nuk mund të paraqitet si karikaturë.
Muzeu duhet të jetë vendi ku historia ruhet, dokumentohet dhe përcillet me seriozitet te brezat e rinj. Veshjet dhe sendet personale të Çerçiz Topullit janë objekte të trashëgimisë historike dhe kërkojnë një trajtim që respekton rëndësinë e tyre.
Reagimet e shumta në rrjetet sociale dhe kritikat publike sollën më pas edhe një zhvillim institucional.
Kreu i Agjencisë së Trashëgimisë Kulturore në Gjirokastër, Florian Hysi, dha dorëheqjen nga detyra, pas polemikave të krijuara rreth mënyrës së ekspozimit të figurës së Çerçiz Topullit.
Hysi ia paraqiti zyrtarisht dorëheqjen kryebashkiakut Flamur Golemi, duke e lidhur vendimin me përgjegjësinë morale për situatën e krijuar. Sipas deklarimit të tij publik, gabimi tashmë ishte korrigjuar.
Dhe korrigjimi erdhi menjëherë.
Portreti i kontestuar u hoq nga struktura ekspozuese, ndërsa veshjet historike të Çerçiz Topullit tashmë paraqiten mbi një manekin neutral, pa fytyrë.
Ky ndryshim e zhvendos vëmendjen aty ku duhet të jetë: te veshjet, sendet personale dhe historia e njeriut që ato përfaqësojnë.
Por episodi ngre një pyetje më të madhe: sa kujdes tregohet në institucionet tona për mënyrën se si paraqiten figurat që përbëjnë memorien kombëtare?
Çerçiz Topulli nuk është thjesht një emër në një tabelë muzeu. Ai është pjesë e historisë së Gjirokastrës dhe e historisë kombëtare shqiptare.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
