Nga Redaksia – Greqia po zgjeron programin e saj për përballimin e tkurrjes demografike në zonat e largëta dhe kufitare, duke ofruar mbështetje financiare deri në 10 mijë euro për familjet që vendosin të zhvendosen dhe të jetojnë në këto territore.
Sipas raportimeve të fundit nga mediat greke dhe burimeve ndërkombëtare, programi do të shtrihet edhe në zona të Epirit pranë kufirit me Shqipërinë. Në mesin e bashkive të përfshira janë Suli dhe Filati në Thesproti, ndërsa në zonën e Janinës përmenden edhe Pogoni dhe Konica.
Aplikimet për skemën e zgjeruar pritet të hapen në tetor.
Skema parashikon një mbështetje financiare që mund të arrijë deri në 10 mijë euro për familje, ndërsa 50 për qind e shumës mund të jepet si paradhënie.
Qëllimi i programit është të tërheqë banorë të rinj në zona ku popullsia është pakësuar ndjeshëm gjatë viteve të fundit për shkak të emigrimit dhe largimit të banorëve drejt qendrave të mëdha urbane.
Përfituesit duhet të plotësojnë kushtet e përcaktuara nga programi dhe të kenë të drejtë të jetojnë dhe punojnë ligjërisht në Greqi. Në kategoritë e mundshme të përfituesve përfshihen edhe nomadët digjitalë. Ndërkohë, është hequr edhe kërkesa për një parakontratë pune si kusht paraprak.
Plani grek nuk kufizohet vetëm te ndihma financiare.
Në zonat e përfshira parashikohen edhe investime në infrastrukturën bazë dhe shërbimet publike, përfshirë kopshte, shkolla dhe qendra shëndetësore.
Synimi është që familjet që zhvendosen në këto territore të kenë kushtet për të ndërtuar një jetë të qëndrueshme dhe të mos detyrohen të largohen përsëri drejt Athinës, Selanikut apo qyteteve të tjera të mëdha.
Programi pritet të shtrihet edhe në zona të tjera kufitare të Greqisë, përfshirë territore pranë kufijve me Maqedoninë e Veriut, Bullgarinë dhe Turqinë.
Zgjerimi i programit në Epir ka një rëndësi të veçantë për shkak të problemeve demografike që kanë prekur prej vitesh shumë prej zonave malore dhe kufitare të Greqisë veriperëndimore.
Suli, Filati, Pogoni dhe Konica janë territore të karakterizuara nga largimi i popullsisë dhe plakja demografike.
Disa prej këtyre zonave kanë gjithashtu një histori të lidhur me popullsinë shqiptare çame dhe me historinë e marrëdhënieve shqiptaro-greke. Megjithatë, programi i qeverisë greke paraqitet zyrtarisht si një politikë demografike dhe zhvillimore dhe jo si një program i deklaruar zyrtarisht si “ripopullimi i Çamërisë”.
Politika e mbështetjes për vendosjen e familjeve në territore me probleme demografike nuk është krejt e re.
Një nga zonat ku është aplikuar më herët një skemë e tillë është ishulli Kastellorizo, ku autoritetet greke kanë ndërhyrë për të ruajtur një prani të qëndrueshme civile në një territor të vogël dhe strategjik.
Tashmë Athina po synon ta zgjerojë këtë qasje në zona të tjera të vendit që përballen me shpopullim, veçanërisht në territoret malore dhe kufitare.
Në këtë mënyrë, Greqia po përpiqet të kombinojë stimulimin financiar me investimet në shërbimet publike, me objektivin për të frenuar vazhdimin e boshatisjes së këtyre zonave.
Për zonat e Epirit pranë kufirit shqiptar, programi merr një dimension të veçantë për shkak të pozicionit gjeografik, historisë së tyre dhe rëndësisë që kanë për strukturën demografike të Greqisë veriperëndimore.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
