Nga Redaksia – Një përplasje e fortë mes Edi Ramës dhe ministrit të Brendshëm, Besfort Lamallari, ka ndodhur për mënyrën se si Policia e Shtetit duhet të vepronte ndaj protestës.
Sipas informacioneve që disponon PatriotikMedia.al, Edi Rama i kishte dhënë dje urdhër ministrit të Brendshëm, Besfort Lamallari, që Policia të ndërhynte për të penguar marshimin e protestuesve, me argumentin se ata po pengonin qarkullimin rrugor.
Por Lamallari ka kundërshtuar urdhrin.
Ministri i Brendshëm i ka bërë të qartë kryeministrit se një ndërhyrje e Policisë në atë moment do të sillte përshkallëzim të situatës dhe një reagim të fortë nga protestuesit. Lamallari ka argumentuar gjithashtu se një ndërhyrje e tillë nuk mund të bëhej në kundërshtim me përcaktimet ligjore që rregullojnë tubimet dhe protestat.
Më poshtë mund të lexoni:
Debati mes Ramës dhe Lamallarit ka zgjatur disa minuta në telefon.
Por vetëm pak orë pas këtij debati, Rama ka marrë vendimin e papritur: Besfort Lamallari largohet nga drejtimi i Ministrisë së Brendshme.
Në vend të tij pritet të emërohet Ervin Demo, i cili deri tani ka mbajtur postin e ministrit të Shtetit për Pushtetin Vendor.
Koha e këtij ndryshimi nuk mund të kalojë pa u vënë në pikëpyetje.
Lamallari ishte në krye të Ministrisë së Brendshme që prej marsit 2026. Vetë faqja zyrtare e Ministrisë së Brendshme e konfirmon këtë pozicion.
Ndërkohë, Ervin Demo ka mbajtur postin e ministrit të Shtetit për Pushtetin Vendor.
Pra, në një moment kur protestat vazhdojnë dhe kur qeveria përballet me një situatë gjithnjë e më të tensionuar në rrugë, kryeministri vendos të ndryshojë pikërisht drejtuesin e institucionit që ka në varësi Policinë e Shtetit.
Burimet bëjnë me dije se shkak i drejtpërdrejtë i përplasjes ka qenë pikërisht mënyra e ndërhyrjes ndaj protestës.
Lamallari ka refuzuar të ndjekë urdhrin për një ndërhyrje që, sipas tij, do ta përshkallëzonte situatën dhe do të krijonte një përplasje të drejtpërdrejtë mes Policisë dhe protestuesve.
Dhe përgjigjja politike e Ramës ka qenë e menjëhershme: ndryshimi i ministrit.
Rama ndryshon strategjinë për protestat?
Lëvizja vjen pas një vere të shoqëruar me protesta, të cilat mazhoranca i kishte konsideruar si një valë që do të shuhej gjatë muajit gusht.
Por protesta nuk u shua.
Përkundrazi, ajo ka vijuar edhe gjatë shtatorit, duke e vendosur qeverinë përballë një situate të re politike.
Në këto kushte, largimi i Lamallarit dhe ardhja e Ervin Demos në krye të Ministrisë së Brendshme merr një rëndësi të veçantë.
A është ky thjesht një ndryshim në qeveri apo Rama po kërkon një drejtim tjetër të Ministrisë së Brendshme përballë protestave?
Një gjë është e qartë: përplasja për mënyrën se si duhej vepruar ndaj protestuesve dhe shkarkimi i menjëhershëm i ministrit e bëjnë këtë ndryshim shumë më tepër sesa një rotacion të zakonshëm qeveritar.
Lamallari nuk pranoi përplasjen me protestuesit. Rama e zëvendësoi.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
