Nga Redaksia -Pushimet verore kanë sjellë një fluks të madh udhëtarësh në aeroportet evropiane, por krahas sezonit turistik kanë nisur edhe problemet me pritjet e gjata në kufi. Shkaku kryesor është sistemi i ri elektronik i regjistrimit të hyrjeve dhe daljeve, i njohur si EES (Entry/Exit System), i cili po shkakton vonesa në shumë pika kufitare të Bashkimit Evropian.
Sipas mediave gjermane, mijëra pasagjerë po përballen çdo ditë me radhë të gjata në aeroporte, pasi procedurat e reja kërkojnë më shumë kohë për çdo udhëtar që hyn ose del nga territori i BE-së.
Sistemi EES, i cili ka hyrë në fuqi plotësisht në muajin prill, ka zëvendësuar vulat tradicionale në pasaporta për shtetasit e vendeve jashtë Bashkimit Evropian. Tashmë, çdo udhëtar duhet të regjistrojë të dhënat biometrike, përfshirë gjurmët e gishtërinjve dhe skanimin e fytyrës, sa herë kalon kufirin.
Megjithëse sistemi synon të rrisë sigurinë dhe të përmirësojë kontrollin kufitar, në praktikë ai po krijon bllokime të konsiderueshme, sidomos gjatë orëve me fluks të lartë pasagjerësh.
Edhe kompanitë ajrore kanë ngritur alarmin. Ryanair dhe easyJet kanë shprehur shqetësimin se infrastruktura aktuale nuk është ende e përgatitur për të përballuar numrin e madh të udhëtarëve gjatë sezonit veror, duke paralajmëruar se procedurat e reja po shkaktojnë vonesa të shumta.
Ndërkohë, presioni ndaj institucioneve evropiane po shtohet. Nëntë shtete – Belgjika, Franca, Gjermania, Greqia, Italia, Malta, Holanda, Portugalia dhe Zvicra – kanë kërkuar që të ruhet mundësia për pezullimin e përkohshëm të kontrolleve të EES në raste emergjente, me qëllim shmangien e kaosit në aeroporte gjatë periudhave me ngarkesën më të madhe të udhëtimeve.
Më poshtë mund të lexoni:
Sipas këtyre vendeve, edhe pse sistemi është i rëndësishëm për rritjen e sigurisë kufitare, nevojitet më shumë fleksibilitet në zbatimin e tij, në mënyrë që të mos bllokohet qarkullimi i pasagjerëve.
Nga ana tjetër, Komisioni Evropian vijon ta mbrojë sistemin e ri, duke argumentuar se EES do të forcojë kontrollin e kufijve të jashtëm të Bashkimit Evropian, do të luftojë më mirë migracionin e paligjshëm dhe do të rrisë sigurinë në afatgjatë.
Megjithatë, për momentin realiteti në shumë aeroporte europiane është ndryshe. Radhët e gjata, vonesat dhe procedurat më të ngadalta po krijojnë stres për mijëra udhëtarë, ndërsa disa prej tyre rrezikojnë të humbasin edhe fluturimet e planifikuara gjatë kulmit të sezonit turistik.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
