Nga Redaksia – Pavarësisht protestave të përditshme që prej afro dy muajsh kanë mbushur sheshet e vendit, qeveria e drejtuar nga Edi Rama ka vijuar me miratimin e ndryshimeve që lidhen me privatizimin dhe dhënien në përdorim të pronave shtetërore. Vendimet e fundit të Këshillit të Ministrave kanë nxitur reagime të forta, pasi kritikët i konsiderojnë si një hap tjetër drejt tjetërsimit të pronës publike, përfshirë edhe zonat e mbrojtura.
Sipas ndryshimeve të miratuara, subjekteve që kanë realizuar investime në masën mbi 750 për qind të vlerës së truallit, në përputhje me planin e biznesit dhe që kanë respektuar kushtet kontraktore, u lind e drejta të kërkojnë privatizimin e pronës edhe pa përfunduar afati trevjeçar i kontratës. Kërkesa duhet të shoqërohet me një raport vlerësimi nga një ekspert i pavarur dhe një auditues ligjor.
Ky ndryshim shihet nga kundërshtarët e qeverisë si një mekanizëm që përshpejton kalimin e pronave shtetërore në duar private dhe, sipas tyre, krijon mundësi edhe për privatizimin e zonave të mbrojtura.
Vendimet janë miratuar në një kohë kur protestat qytetare vazhdojnë në Tiranë, ku një nga kërkesat kryesore të protestuesve është ndalimi i tjetërsimit të pronës publike dhe shfuqizimi i ligjeve që lidhen me investimet strategjike dhe zonat e mbrojtura.
Sipas raportimeve publike, Bashkimi Europian ka shprehur shqetësime lidhur me kuadrin ligjor për investimet strategjike dhe mbrojtjen e zonave natyrore, duke kërkuar përafrimin e legjislacionit shqiptar me standardet europiane në kuadër të procesit të integrimit.
Nga ana tjetër, opozita dhe organizatorët e protestave pretendojnë se ndryshimet e fundit tregojnë se qeveria nuk ka ndërmend të tërhiqet nga politikat e saj për pronat publike, pavarësisht presionit të brendshëm dhe kritikave ndërkombëtare.
Debati mbi këto vendime pritet të mbetet në qendër të vëmendjes, pasi prek drejtpërdrejt administrimin e pronës publike, mbrojtjen e zonave natyrore dhe procesin e integrimit europian të Shqipërisë.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
