Nga Redaksia – Një analizë e fundit e CIA-s ka ngritur alarm në qarqet politike dhe ushtarake amerikane, pasi sipas vlerësimeve të inteligjencës, Irani është në gjendje t’i rezistojë për tre deri në katër muaj një bllokade amerikane në Ngushticën e Hormuzit pa u përballur me kolaps ekonomik serioz.
Ky raport bie ndesh me deklaratat optimiste të presidentit amerikan Donald Trump dhe figurave të tjera të administratës amerikane, të cilët kishin pretenduar se presioni ekonomik dhe izolimi detar do ta detyronin Teheranin të tërhiqej brenda një kohe të shkurtër.
Sipas analizës së CIA-s, Republika Islamike ka ndërtuar prej vitesh një strategji mbijetese ekonomike dhe ushtarake përballë sanksioneve dhe kërcënimeve perëndimore. Një nga faktorët kryesorë që e bën Iranin më rezistent është arsenali i madh i raketave balistike dhe dronëve luftarakë, të cilët mund të përdoren për të destabilizuar të gjithë rajonin e Gjirit Persik dhe për të kërcënuar infrastrukturën energjetike globale.
Ngushtica e Hormuzit konsiderohet një nga arteriet më të rëndësishme të ekonomisë botërore. Rreth një e pesta e naftës globale kalon çdo ditë përmes këtij korridori strategjik detar. Çdo përshkallëzim ushtarak në këtë zonë mund të shkaktojë tronditje të mëdha ekonomike, rritje të çmimeve të energjisë dhe tensione globale.
Raporti i CIA-s është shpërndarë këtë javë tek zyrtarët e lartë të administratës amerikane dhe ka hapur debat të fortë në Washington mbi efektivitetin real të strategjisë së bllokadës kundër Iranit. Disa analistë amerikanë paralajmërojnë se një përballje e zgjatur mund të rezultojë në një konflikt të pakontrollueshëm rajonal, ku SHBA-ja dhe aleatët e saj do të përballeshin me kosto të larta ekonomike dhe ushtarake.
Në sfondin e kësaj situate, Irani vazhdon të forcojë lidhjet me Rusinë dhe Kinën, duke krijuar një bosht strategjik që po sfidon hapur dominimin amerikan në Lindjen e Mesme. Për shumë ekspertë gjeopolitikë, ky zhvillim tregon se epoka e ndërhyrjeve të shpejta amerikane po bëhet gjithnjë e më e vështirë në një botë që po kalon drejt një rendi shumëpolar.
Publikimi i këtij vlerësimi nga vetë CIA përbën një sinjal të fortë se realiteti në terren mund të jetë shumë më kompleks sesa propaganda politike që serviret në publik. Ndërsa Washingtoni kërkon të ruajë presionin maksimal ndaj Teheranit, inteligjenca amerikane duket se po paralajmëron se Irani nuk është një kundërshtar që mund të thyhet lehtë me sanksione apo bllokada detare.