Nga Redaksia – Lufta në Ukrainë po hyn në një fazë edhe më të rrezikshme, ku për herë të parë Moska po paralajmëron publikisht një goditje masive ndaj qendrave vendimmarrëse në Kiev nëse Ukraina guxon të sulmojë paradën e “Ditës së Fitores” në Moskë më 9 Maj. Paralajmërimi i Ministrisë së Mbrojtjes ruse, i shoqëruar me deklarata të Ministrisë së Jashtme dhe teste raketore balistike nga Kamçatka, nuk duket si një propagandë e zakonshme diplomatike, por si një sinjal serioz për përshkallëzim ushtarak.
Nëse deri dje Kremlini ruante një lloj frenimi strategjik për të shmangur një përballje direkte të pakontrollueshme me Perëndimin, sot duket se linja e “të moderuarve” brenda pushtetit rus po humbet terren përballë krahut të ashpër nacionalist dhe ushtarak.
Moska ka investuar simbolikisht shumë tek parada e 9 Majit. Për Rusinë, kjo datë nuk është thjesht një festë ushtarake, por simboli i fitores sovjetike mbi nazizmin dhe një element i identitetit shtetëror rus. Një sulm ukrainas ndaj paradës do të ishte jo vetëm goditje ushtarake, por edhe poshtërim kombëtar për Putinin.
Kjo është arsyeja pse Kremlini ka lëshuar paralajmërime kaq të drejtpërdrejta. Nëse Rusia do të kërcënonte me “hakmarrje dërrmuese” dhe më pas nuk do të reagonte, ajo do të humbiste jo vetëm autoritetin ndërkombëtar, por edhe kontrollin psikologjik mbi opinionin publik rus.
Në prag të zgjedhjeve të ardhshme për Dumën, partia “Rusia e Bashkuar” nuk mund të përballojë perceptimin e dobësisë. Brenda Rusisë po rritet presioni nga qarqet nacionaliste dhe komuniste që kërkojnë luftë më agresive dhe goditje direkte ndaj elitës politike ukrainase.
Për më shumë se dy vite, Vladimir Putin është përpjekur të mbajë konfliktin nën një kufi të kontrolluar. Ai shmangu eliminimin total të infrastrukturës politike të Kievit dhe nuk autorizoi goditje të plota ndaj qendrave kryesore të pushtetit ukrainas.
Arsyeja kryesore ishte frika nga një spirale e pakontrollueshme që mund të çonte në përballje direkte NATO-Rusi dhe potencialisht në Luftë të Tretë Botërore.
Por situata ka ndryshuar.
Rikthimi i Donald Trump në Shtëpinë e Bardhë solli shpresa në Moskë për një marrëveshje strategjike me SHBA-në. Megjithatë, sipas analizave gjeopolitike, negociatat kanë ngecur. SHBA kërkon ngrirjen e konfliktit pa adresuar kërkesat themelore të Rusisë, ndërsa Moska refuzon kompromiset që i konsideron kapitullim strategjik.
Në të njëjtën kohë, Uashingtoni ka intensifikuar presionin ndaj ndikimit rus në shumë rajone të botës. Kjo ka dobësuar pozitat e krahut “moderator” në Kremlin dhe ka forcuar figurat që kërkojnë përgjigje shumë më të ashpra ushtarake.
Sinjalet tregojnë se Rusia po përgatit opinionin publik ndërkombëtar për një ndryshim doktrine: nga lufta e kufizuar drejt goditjeve direkte ndaj “qendrave vendimmarrëse”.
Në gjuhën ushtarake ruse, kjo do të thotë objektiva politike, komanduese dhe strategjike në zemër të Kievit.
Paralajmërimi ndaj diplomatëve dhe civilëve në Kiev nuk është rastësi. Historikisht, Rusia dhe SHBA kanë përdorur paralajmërime të tilla para operacioneve të mëdha ushtarake, për të shmangur viktima të huaja dhe për të legjitimuar goditjen në arenën ndërkombëtare.
Nëse Ukraina tenton të godasë Moskën më 9 Maj, atëherë bota mund të shohë një nga sulmet më të mëdha ruse që nga fillimi i luftës.
Problemi më i madh nuk është vetëm Ukraina apo Rusia. Çdo përshkallëzim i tillë rrit rrezikun e përfshirjes më të drejtpërdrejtë të NATO-s dhe e afron botën me një konflikt global.
Sot nuk kemi më vetëm një luftë territoriale. Kjo është kthyer në një betejë për prestigj, dominim gjeopolitik dhe mbijetesë politike të elitave në Moskë dhe Perëndim.
Dhe kur fuqitë bërthamore fillojnë të flasin me gjuhën e “hakmarrjes dërrmuese”, atëherë rreziku nuk mbetet më vetëm në Ukrainë — por mbi gjithë Evropën.