Nga Redaksia – Një proces zgjedhor me pjesëmarrje të gjerë është zhvilluar këtë të diel, më 19 prill 2026, në Degën e Partia Demokratike e Shqipërisë në Krujë, ku demokratët i janë drejtuar kutive të votimit për të zgjedhur drejtuesin e ri të degës së bashkuar Krujë – Fushë Krujë.
Pas përfundimit të procesit të numërimit, fitues është shpallur kandidati Aulon Ylli Kalaja, i cili ka arritur të marrë një mbështetje dërrmuese përballë rivalit të tij Myftar Hysen Ismailaja.
Sipas procesverbalit zyrtar, në këto zgjedhje kanë marrë pjesë gjithsej 717 anëtarë të Partisë Demokratike nga zona të ndryshme si Kruja, Fushë Kruja, Thumana, Burizana, Cudhis, Nikla dhe Bubqi. Nga këto vota, Aulon Ylli Kalaja ka siguruar plot 622 vota, duke u konfirmuar si kryetari i ri i degës.
Ky rezultat tregon një mbështetje të fortë të bazës demokrate për drejtimin e ri, në një moment që konsiderohet kyç për riorganizimin dhe forcimin e strukturave të opozitës në nivel lokal.
Zgjedhjet në Krujë vijnë në një kohë kur strukturat e Partia Demokratike e Shqipërisë janë në një proces riformatimi dhe konsolidimi, ndërsa pritet që drejtuesit e rinj të degëve të luajnë një rol të rëndësishëm në përballjen politike në vijim.
Fitorja e Aulon Ylli Kalaja në Krujë shihet si një sinjal i mobilizimit të demokratëve në terren dhe një hap drejt ringritjes së strukturave të partisë në këtë zonë me peshë historike dhe politike.