Nga Redaksia:
Dosja Epstein vazhdon të prodhojë tronditje politike në Shtetet e Bashkuara dhe jo vetëm. Në qendër të zhvillimeve më të fundit ndodhet Ghislaine Maxwell, bashkëpunëtorja më e afërt e financierit pedofil Jeffrey Epstein, e dënuar me 20 vite burg për trafikim seksual të vajzave të mitura.
Sipas raportimeve të mediave amerikane, Maxwell – përmes avokatëve të saj – ka dërguar një sinjal të qartë drejt ish-presidentit Donald Trump: nëse përfiton falje ose lehtësim dënimi, ajo është e gatshme të dëshmojë dhe të “pastrojë emrin” e tij nga çdo lidhje komprometuese me Epstein.
Maxwell, “kontributorja” kryesore e rrjetit Epstein
Ghislaine Maxwell është dënuar nga drejtësia amerikane si figura kyçe që rekrutonte, manipulonte dhe sillte vajza e fëmijë për Jeffrey Epstein, i cili vdiq në mënyrë të dyshimtë në burg në vitin 2019, para se të përballej me gjyqin.
Gjykata federale e shpalli Maxëell fajtore për disa akuza të rënda, duke e cilësuar atë si hallkën lidhëse mes Epstein dhe elitave politike, financiare dhe mediatike që frekuentonin rrethin e tij.
Mesazh politik nga burgu
Zhvillimi i fundit është politikisht eksploziv: avokati i Maxwell ka bërë të ditur se ajo mund të flasë përpara Kongresit amerikan, por vetëm nëse i garantohet se dëshmia e saj nuk do të përdoret kundër saj dhe se ekziston mundësia reale e faljes.
Në thelb, bëhet fjalë për një ofertë të heshtur: dëshmi që mund të ndikojnë narrativën publike mbi lidhjet e Trump me Epstein, në këmbim të ndërhyrjes presidenciale.
A përfshihet Kongresi amerikan?
Sipas burimeve mediatike, kjo lëvizje mund të shqyrtohet në Kongres, pasi çështja Epstein është kthyer në temë të hetimeve parlamentare dhe presionit publik. Demokratë dhe republikanë kanë kërkuar transparencë mbi listat e klientëve, marrëdhëniet e Epstein dhe arsyet pse shumë emra të fuqishëm nuk janë prekur kurrë nga drejtësia.
Maxwell, deri tani, ka përdorur të drejtën kushtetuese për të mos dëshmuar (Amendamenti i Pestë), duke lënë të kuptohet se ajo di shumë më tepër sesa është bërë publike.
Trump dhe Epstein: çfarë dihet zyrtarisht
Donald Trump nuk është akuzuar zyrtarisht për asnjë krim në lidhje me Epstein. Ai ka deklaruar se e ka njohur, por se i ka ndërprerë marrëdhëniet shumë vite më parë. Megjithatë, emri i tij – si ai i shumë figurave të tjera të establishmentit amerikan – është përmendur në dokumente, dëshmi dhe raporte mediatike.
Oferta e Maxwell nuk përbën provë ligjore, por ngre pikëpyetje serioze mbi mënyrën se si dëshmitë, drejtësia dhe politika ndërthuren në nivelet më të larta të pushtetit.