Nga Redaksia:
Shqipëria po përballet me një zhvillim serioz që prek drejtpërdrejt lirinë e shtypit dhe të shprehjes. Në mesnatë, pavarësisht kundërshtimeve të forta nga shoqatat e gazetarëve dhe thirrjeve për tërheqje, mazhoranca socialiste miratoi ndryshimet në Kodin Penal që lidhen me të ashtuquajturin “dekriminalizim të shpifjes”.
Ndryshe nga ajo që pretendohet nga qeveria, shpifja nuk u hoq si vepër penale. Përkundrazi, ligji parashikon një përjashtim të kufizuar nga përgjegjësia penale vetëm për gazetarët që konsiderohen “të regjistruar dhe të njohur”, ndërsa për pjesën tjetër, rreziku penal mbetet plotësisht aktiv. Ofendimi, nga ana tjetër, vazhdon të jetë vepër penale.
Kjo qasje krijon një ndarje të rrezikshme brenda medias dhe hap rrugën për kontroll institucional mbi gazetarinë. Në praktikë, ligji i jep qeverisë mundësinë të përcaktojë se kush konsiderohet gazetar dhe kush jo, duke vendosur një filtër politik mbi të drejtën për të informuar publikun.
Më poshtë mund të lexoni:
Projektligji ka ngritur shqetësime serioze edhe për faktin se Shqipëria nuk ka një sistem formal për regjistrimin e gazetarëve. Krijimi i një regjistri të tillë, sipas ekspertëve të medias, bie ndesh me parimet themelore të lirisë së shprehjes dhe pavarësisë editoriale.
Pas miratimit në Kuvend, reagoi Federata Evropiane e Gazetarëve, e cila përfaqëson disa nga organizatat më të mëdha të medias në Evropë. Federata e cilësoi këtë nismë jo si dekriminalizim, por si një manovër që shkel standardet e Bashkimit Evropian dhe krijon një efekt frikësues mbi gazetarët, shoqërinë civile, aktivistët dhe denoncuesit e korrupsionit.
Sipas Federatës, për sa kohë shpifja mbetet vepër penale, ligji penal do të vazhdojë të përdoret si instrument presioni ndaj atyre që monitorojnë interesin publik. Përjashtimi i kufizuar, i bazuar në status, cenon sigurinë juridike dhe parimin e mbrojtjes së barabartë të lirisë së shprehjes.
Ekspertët paralajmërojnë se ky ligj rrezikon të nxisë autocensurën dhe të dëmtojë rëndë debatin publik, duke e kthyer median në një hapësirë të kontrolluar dhe të kushtëzuar nga pushteti.
Ndërsa qeveria flet për reforma dhe integrim evropian, kritikat nga organizatat ndërkombëtare tregojnë një realitet tjetër: një hap prapa për demokracinë dhe një precedent të rrezikshëm për të ardhmen e lirisë së shtypit në Shqipëri.
Kur pushteti ka frikë nga fjala, do të thotë se ka shumë për të fshehur.
Kur gazetarët kërcënohen, qytetarët humbasin zërin.