Nëntë elektricistë humbën jetën në krye të detyrës gjatë vitit 2026, tragjeditë ngrenë pikëpyetje për sigurinë në punë …

Nga Redaksia – Vdekja e 45-vjeçarit Altin Petanaj në nënstacionin elektrik të Koculit rikthen në vëmendje aksidentet e rënda në sektorin energjetik. Kush mban përgjegjësi për sigurinë e punonjësve në terren?

Një tjetër tragjedi në sektorin energjetik shqiptar. Altin Petanaj, 45 vjeç, humbi jetën mesditën e sotme në nënstacionin elektrik të Koculit në Vlorë, duke u bërë viktima e fundit në një seri aksidentesh që kanë tronditur punonjësit e këtij sektori gjatë vitit 2026.

Sipas rasteve të raportuara, nëntë elektricistë kanë humbur jetën në krye të detyrës që nga fillimi i vitit. Një bilanc tragjik që ngre shqetësime serioze për kushtet e punës, masat mbrojtëse dhe përgjegjësinë e institucioneve që duhet të garantojnë sigurinë e punonjësve.

Nga Koculi në Lezhë, një seri tragjedish pa fund

Vetëm një ditë përpara ngjarjes në Vlorë, Lulzim Shehu humbi jetën në fshatin Vasije të Kalasë së Dodës, pasi u zu poshtë nga një shtyllë elektrike gjatë punës.

Më 12 shtator, Klajdi Zekthi u godit nga rryma elektrike në fshatin Trojas të Belshit, ndërsa po riparonte një defekt. Një ditë më parë, më 11 shtator, Ermal Dëbrova humbi jetën në Patos, pasi ra në kontakt me energjinë elektrike gjatë punës mbi një shtyllë.

Më 8 shtator, Muhamet Sylisufaj ndërroi jetë në rrugën e Dobravës, ndërsa tre kolegë të tij mbetën të plagosur.

Edhe muajt e verës u shoqëruan me aksidente fatale. Më 29 gusht, David Deda humbi jetën në fshatin Karmë të Vaut të Dejës. Më 26 korrik, Agim Beqiri humbi jetën në Zërvaskë të Pogradecit.

Ndërkohë, më 22 korrik, Bashkim Boçi ra nga rreth nëntë metra lartësi në Himarë, pasi iu këput rripi i sigurisë gjatë punës për rikthimin e energjisë pas stuhisë.

Bilanci tragjik kishte nisur më 19 shkurt në Rrilë të Lezhës, ku humbi jetën Mark Prenga.

Kush kontrollon sigurinë e elektricistëve?

Përsëritja e aksidenteve me pasoja fatale kërkon më shumë se deklarata ngushëllimi. Ajo kërkon transparencë, hetime të plota dhe përgjegjësi konkrete.

Rastet e raportuara ngrenë disa pyetje thelbësore:

• A janë pajisur punonjësit me mjetet e duhura mbrojtëse?
• A kontrollohen rregullisht pajisjet e punës dhe rripat e sigurisë?
• A zbatohen procedurat e detyrueshme për ndërprerjen dhe izolimin e energjisë gjatë ndërhyrjeve?
• A janë hetuar të gjitha aksidentet dhe a janë identifikuar përgjegjësitë?
• Çfarë masash konkrete janë marrë për të parandaluar përsëritjen e këtyre tragjedive?

Institucionet përgjegjëse dhe kompanitë e sektorit energjetik duhet të japin përgjigje publike për këto shqetësime.

Jeta e punonjësve duhet të jetë përparësi

Elektricistët janë ndër punonjësit që përballen çdo ditë me rreziqe serioze për të garantuar furnizimin me energji elektrike të mijëra familjeve dhe bizneseve.

Por asnjë defekt, asnjë ndërprerje energjie dhe asnjë afat pune nuk mund të vendoset mbi jetën e njeriut.

Nëntë viktima brenda një viti janë një bilanc që kërkon vëmendje institucionale dhe masa konkrete. Familjet e viktimave meritojnë përgjigje, ndërsa punonjësit që vazhdojnë të dalin çdo ditë në terren meritojnë garanci reale për jetën e tyre. /JOQ

© Copyright of PatriotikMedia.al