ANALIZA: Pesë kërkesat janë objektivi i protestës, jo krijimi i një partie!
Nga Gert Zhaka:
Debati publik nuk duhet të largohet nga thelbi i protestës popullore. Pesë kërkesat janë objektivi kryesor, ndërsa çdo projekt politik duhet të marrë legjitimitetin nga vullneti i lirë i qytetarëve.
Është legjitime të krijohet çdo formacion politik, por kjo duhet të ndodhë në kushtet normale të një demokracie funksionale dhe racionale.
Panelet mediatike që kritikohen si të lidhura me agjendën sorosiane në Shqipëri po përpiqen të zhvendosin vëmendjen nga objektivat e përcaktuara nga protesta popullore: PESË KËRKESAT, të cilat synojnë t’i hapin rrugën qytetarëve për të rifituar sovranitetin e tyre. Në vend që debati publik të përqendrohet te realizimi i tyre, po promovohet ideja e krijimit të një partie politike studentore.
Partia politike është një organizim vullnetar i qytetarëve, i mbështetur mbi një ideologji dhe një program të caktuar, me synimin për të marrë pushtetin përmes zgjedhjeve dhe për të qeverisur shtetin.
Por kush i ka autorizuar personazhet e paneleve mediatike të flasin në emër të studentëve dhe të vetëshpallen përfaqësues të protestës?
Ata që organizojnë sondazhe dhe hedhin në qarkullim tezën e një partie studentore, në të njëjtën kohë rrezikojnë të paraqesin veten si përfaqësues të një lëvizjeje që duhet të shprehë vullnetin e lirë të vetë studentëve.
Më poshtë mund të lexoni:
KJO ËSHTË NJË PËRPJEKJE PËR TË PËRFITUAR POLITIKISHT NGA SAKRIFICA E POPULLIT!
Askush nuk mund të vetëshpallet lider i një proteste popullore. Legjitimiteti nuk fitohet përmes ekraneve televizive, sondazheve apo marrëveshjeve mes personazheve mediatike. Ai buron nga vullneti i lirë i njerëzve dhe nga një proces demokratik, transparent dhe përfaqësues.
Nëse pretendojnë se përfaqësojnë studentët, atëherë le t’ua lënë studentëve të drejtën të zgjedhin përfaqësuesit e tyre përmes një procesi të hapur votimi.
Liderët nuk emërohen nga panelet televizive. Ata marrin legjitimitet nga njerëzit që pretendojnë se përfaqësojnë!
Ajo që po ndodh rrezikon të shndërrohet në një tjetër goditje ndaj protestës, studentëve dhe popullit shqiptar, i cili po përballet me kosto të rënda në përpjekjen për të mbrojtur të drejtat dhe sovranitetin e tij.
Ndërkohë, panelet mediatike vazhdojnë të riciklojnë të njëjtën tezë: «Nëse ikën Rama, kush do të vijë në pushtet?»
Kjo pyetje, e përsëritur vazhdimisht nga të njëjtët personazhe që debatojnë me njëri-tjetrin sikur të ishin kundërshtarë, e zhvendos debatin nga thelbi i krizës politike shqiptare.
Çështja nuk është thjesht se kush do të vijë pas Ramës. Çështja është se si do të ndërtohet një sistem ku pushteti buron nga populli, kontrollohet nga ligji dhe nuk mund të përvetësohet nga asnjë individ apo grup politik.
Shqipëria nuk ka nevojë për një tjetër elitë që vetëshpallet përfaqësuese e popullit. Ka nevojë për institucione demokratike, përgjegjësi politike dhe mekanizma që garantojnë sovranitetin qytetar.
Pesë kërkesat e protestës synojnë të hapin një kapitull të ri në historinë politike të vendit dhe, sipas mbështetësve të tyre, janë brenda kornizës kushtetuese.
Ato nuk duhet të zëvendësohen me projekte partiake të improvizuara dhe as të përdoren si trampolinë për ambiciet personale të askujt.
Pesë kërkesat janë thelbi i rezistencës popullore!
Mos lejoni që objektivi i protestës të zëvendësohet nga ambiciet e atyre që duan të përfitojnë prej saj.
Së pari, të realizohen kërkesat e protestës dhe të krijohen kushtet për rivendosjen e sovranitetit të qytetarëve. Çdo projekt politik që lind më pas duhet të marrë legjitimitetin e tij nga vullneti i lirë i popullit, jo nga vendimet e paneleve mediatike.
SOVRANITETI NUK ËSHTË PRONË E POLITIKANËVE, E MEDIAVE APO E GRUPEVE TË INTERESIT. SOVRANITETI I PËRKET POPULLIT SHQIPTAR!
© Copyright of PatriotikMedia.al
