Nga Redaksia – Një zhvillim i rëndësishëm në një nga çështjet më të debatuara të drejtësisë shqiptare ka ardhur me vendimin e fundit të Gjykatës Kushtetuese. Më 21 korrik 2026, vendim i zbardhur dhe i bërë publik së fundmi, Gjykata Kushtetuese ka pranuar ankimin e ish-oficerit të policisë Dritan Zagani, duke shfuqizuar vendimin e Kolegjit Penal të Gjykatës së Lartë të datës 18 shkurt 2025 dhe duke e kthyer çështjen për rishqyrtim.
Ky vendim konsiderohet si kthesa e parë e rëndësishme në rrugën drejt rivlerësimit të një procesi gjyqësor që prej vitesh është shoqëruar me debate të forta politike, juridike dhe publike.
Dritan Zagani, ish-shef i Seksionit të Narkotikëve në Policinë e Fierit, u dënua me 4 vite e 6 muaj burg për veprat penale “shpërdorim detyre” dhe “moskallëzim krimi”. Gjatë gjithë procesit, ai nuk u akuzua se kishte përfituar personalisht nga detyra apo se kishte bashkëpunuar me trafikantë droge. Episodet mbi të cilat u mbështet akuza lidhen me operacione policore që rezultuan në sekuestrimin e 109 kilogramëve kanabis në Shqipëri dhe arrestimin në Itali të një personi me 6 kilogramë kokainë.
Megjithatë, sipas mbrojtjes së tij, gjykatat nuk identifikuan qartë një dispozitë ligjore konkrete të shkelur, një dëm të shkaktuar apo një qëllim kriminal që do të justifikonte përgjegjësinë penale të Zaganit.
Çështja e tij nuk mund të ndahet nga klima politike e kohës. Zagani ishte një nga zyrtarët që denoncoi publikisht lidhjet e pretenduara të ish-ministrit të Brendshëm Saimir Tahiri me grupin Habilaj, si edhe dekonspirimin e operacioneve kundër trafikut të drogës.
Përpara se gjykatat të jepnin një vendim përfundimtar, Kryeministri Edi Rama dhe drejtues të Ministrisë së Brendshme e akuzuan publikisht Zaganin, duke e cilësuar si bashkëpunëtor të trafikantëve dhe duke vënë në dyshim motivet e denoncimeve të tij. Më pas, Zagani u largua nga Shqipëria dhe përfitoi mbrojtje ndërkombëtare si azilkërkues.
Ndërkohë, zhvillimet e mëvonshme treguan se grupi Habilaj u bë objekt i procedimeve penale, ndërsa ish-ministri Saimir Tahiri u dënua nga drejtësia shqiptare.
Një nga pikat kryesore të procesit lidhet me një operacion policor në Levan të Fierit. Sipas provave të paraqitura në gjykatë, Zagani kishte siguruar informacion operacional dhe ia kishte raportuar atë eprorit të tij të drejtpërdrejtë, Skënder Hita, i cili drejtoi operacionin së bashku me strukturat e tjera të policisë.
Sipas akuzës, mungesa e koordinimit ndërmjet drejtuesve të operacionit dhe qendrës krijoi probleme në një operacion tjetër. Megjithatë, përgjegjësia penale iu atribua vetëm Zaganit, ndërsa drejtuesit e operacionit nuk u proceduan.
Një element që ka ngjallur debat është fakti se Skënder Hita, ish-eprori i Zaganit në atë periudhë, u emërua Drejtor i Përgjithshëm i Policisë së Shtetit më 30 mars 2026. Ky kontrast është përdorur nga mbrojtja si argument për të vënë në diskutim trajtimin selektiv të përgjegjësisë penale.
Në arsyetimin e saj, Gjykata Kushtetuese vlerësoi se Gjykata e Lartë nuk kishte analizuar në mënyrë të plotë pretendimet thelbësore të mbrojtjes dhe se mënyra e shqyrtimit e kishte bërë aksesin e Zaganit në drejtësi vetëm formal, duke cenuar të drejtën për një proces të rregullt ligjor.
Tashmë, Gjykata e Lartë do të duhet të rishqyrtojë çështjen dhe t’u japë përgjigje disa pyetjeve thelbësore juridike: cili ishte konkretisht ligji i shkelur nga Dritan Zagani, mbi çfarë baze ai mund të mbajë përgjegjësi penale për një operacion të drejtuar nga eprorët e tij, cilat ishin pasojat konkrete të veprimeve të tij dhe përse nuk u morën në konsideratë provat shfajësuese dhe pretendimet për presion publik ndaj tij.
Vendimi i Gjykatës Kushtetuese nuk shpall pafajësinë e Dritan Zaganit, por rrëzon pengesën procedurale që mbante në fuqi vendimin e mëparshëm dhe hap rrugën për një shqyrtim të ri të çështjes.
Rasti Zagani mbetet një provë e rëndësishme për sistemin shqiptar të drejtësisë, jo vetëm për mënyrën se si trajtohen proceset penale me ndikim publik, por edhe për mbrojtjen e sinjalizuesve që denoncojnë korrupsionin dhe lidhjet e mundshme ndërmjet zyrtarëve publikë dhe krimit të organizuar.
Në muajt në vijim, vëmendja do të përqendrohet te mënyra se si Gjykata e Lartë do ta trajtojë këtë çështje pas udhëzimeve të Gjykatës Kushtetuese, në një proces që pritet të ketë ndikim jo vetëm për Dritan Zaganin, por edhe për besimin e publikut te drejtësia shqiptare.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
