Nga Redaksia –Një tjetër denoncim i fortë ka dalë në publik nga ish-denoncuesi i AKSHI-t, Gent Progni, i cili përmes një reagimi publik ka hedhur akuza të rënda mbi mënyrën se si, sipas tij, është ndërtuar dhe administruar databaza e famshme e patronazhimit në Shqipëri.
Përshëndetje edhe sot, si ditë e diel nuk rrimë dot pushim nga AKSHI. Pavarësisht gjithçkaje, domethënë edhe pagesave për domenet që bëjnë të mundur hapjen e faqeve, kam konstatuar se ka pasur edhe problematika të tjera me AKEP-in, pasi shumë faqe me domain “.al” kanë dalë jashtë funksionit. Kjo çështje do të vijojë të ndiqet dhe të hetohet.
Sot dua të jap disa indicie për SPAK-un lidhur me atë që është përfolur si databaza e patronazhimit. Sipas asaj që unë kam informacion dhe kam ndjekur, në atë periudhë nuk ka qenë Daniel Shima në atë rol, por struktura të tjera kanë qenë të përfshira në administrimin e sistemit.
Sipas pretendimeve të mia, gjatë kohës kur AKSHI drejtohej nga Mirlinda Karçanaj, është kryer një proces pastrimi, përpunimi dhe azhornimi të të dhënave shtetërore, i cili më pas lidhet me ndërtimin e një sistemi të njohur publikisht si databaza e patronazhimit, që sipas këtyre pretendimeve shtrihej deri në nivel qendrash votimi.
Gjithashtu pretendohet se Alfred Peza, në atë periudhë me rol drejtues politik në Partinë Socialiste, ka sjellë në AKSHI një person të quajtur Orlando Karamani, i cili është vendosur në një pozicion të rëndësishëm brenda institucionit, së bashku me tre persona të tjerë, me detyra që lidhen me përpunimin dhe administrimin e të dhënave.
Sipas këtyre pretendimeve, këta persona kanë bashkëpunuar brenda AKSHI-t në proceset e azhornimit dhe pastrimit të databazave, duke komunikuar edhe përmes email-eve me struktura të Partisë Socialiste, gjithmonë në kuadër të detyrave të tyre institucionale.
Ndiqni videon:
Më tej pretendohet se një prej këtyre personave ka krijuar më pas një kompani private me emrin “BETE”, e cila sipas këtyre pretendimeve ka përfituar fonde publike në vlerë rreth 59 milionë lekë për projekte të ndryshme, të cilat kërkojnë verifikim të mëtejshëm nga institucionet përkatëse.
Në vijim të denoncimit, përmendet edhe RTSH, ku pretendohet se Alfred Peza ka mbajtur post drejtues. Sipas këtyre pretendimeve, në atë periudhë janë raportuar edhe probleme me servera dhe të dhëna të institucionit, por pa sqarime zyrtare të plota mbi rrethanat.
Gjithashtu lidhen edhe disa tendera në RTSH për pajisje DVB me vlera të konsiderueshme, si dhe procedura të tjera në institucione publike si ARRSH, për të cilat ngrihen dyshime që kërkojnë hetim dhe verifikim.
Si përfundim e mbyll Progni, i bëj thirrje SPAK-ut që të marrë në shqyrtim këto indicie dhe të hetojë më tej çdo lidhje të mundshme mes institucioneve shtetërore, databazave, dhe kompanive private që kanë përfituar fonde publike.
Ky material është pronë e Patriotikmedia.al dhe është i mbrojtur nga ligjet për të drejtën e autorit. Ndalohet riprodhimi, apo publikimi i plotë apo i pjesshëm i këtij materiali pa lejen e shkruar paraprakisht nga redaksia. Shkelësit do të përballen me pasojat ligjore sipas legjislacionit në fuqi.