Nga PatriotikMedia.al
Në vitet e fundit, një nga debatet më të forta në opinionin publik shqiptar lidhet me drejtimin ekonomik dhe social që ka marrë vendi. Kritikat e vazhdueshme të Avokatit Altin Goxhaj mbi politikat e qeverisë “Rilindja” po rikthehen sërish në vëmendje, ndërsa zhvillimet më të fundit në fushën e investimeve dhe tregut të punës po ngrenë pikëpyetje serioze mbi të ardhmen e fuqisë punëtore shqiptare.
Sipas denoncimeve dhe analizave kritike të bëra më herët nga Goxhaj, Shqipëria po kalon një proces të heshtur largimi të qytetarëve të saj, ndërkohë që po hapet gjithnjë e më shumë ndaj fuqisë punëtore të huaj për të mbushur boshllëqet në tregun e punës. Ky trend, sipas kritikëve, po shoqërohet me mungesë strategjie për ndalimin e emigracionit masiv të shqiptarëve.
Në këtë kontekst, deklaratat e fundit nga përfaqësues diplomatikë të huaj në Tiranë kanë shtuar debatet. Ambasadori i Indisë në Shqipëri deklaroi se projektet e investimeve janë ende në faza fillestare dhe se do të duhet kohë që ato të materializohen realisht.
“Janë aktualisht aktive, por po punojmë për të promovuar investimet. Do të duhet pak kohë sepse ne jemi këtu vetëm prej para dy vitesh, kështu që do të duhet kohë para se investimet të vijnë realisht”, u shpreh ai.
Kjo deklaratë, e lexuar në një kontekst më të gjerë ekonomik, ngre pikëpyetje mbi ritmin e zhvillimit dhe efektet reale që këto marrëveshje po sjellin për qytetarët shqiptarë, të cilët vazhdojnë të përballen me largim masiv drejt vendeve të BE-së.
Ndërkohë, në kuadër të marrëdhënieve 70-vjeçare mes Shqipërisë dhe Indisë, janë paralajmëruar një sërë aktivitetesh kulturore, përfshirë ekspozita të dedikuara për Nënë Terezën dhe mbrëmje kulturore indiane në Shqipëri.
Por për kritikët e qeverisë, këto zhvillime nuk e zëvendësojnë problemin kryesor: boshatisjen e vendit nga shqiptarët dhe mungesën e një politike të qartë për kthimin e tyre.
Debati mbetet i hapur mes atyre që shohin në këto procese një hapje ekonomike dhe atyre që paralajmërojnë për një transformim të rrezikshëm social e demografik të Shqipërisë.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.