Nga Redaksia:
Shqipëria “dixhitale” u zgjua sërish në kolaps këtë të premte. Njëra pas tjetrës, faqet më të rëndësishme publike ranë nga sistemi, duke lënë mijëra biznese dhe qytetarë në errësirë totale administrative.
Faqet e bllokuara:
5
- Agjencia e Prokurimeve Publike
- INSTAT
- Qendra Kombëtare e Biznesit
- Komisioni i Prokurimeve Publike
- Autoriteti i Konkurrencës
Asnjë njoftim zyrtar. Asnjë transparencë. Asnjë përgjegjësi.
A është një “defekt teknik”? Apo një problem shumë më i thellë që lidhet me sigurinë dhe menaxhimin e sistemit dixhital kombëtar?
Rastësi apo zinxhir dështimesh?
Kolapsi ndodh vetëm pak orë pas emërimit të Igli Tafaj në krye të Agjencia Kombëtare e Shoqërisë së Informacionit (AKSHI), pas shkarkimit të ish-drejtoreshës së arrestuar Mirlinda Karçanaj.
A është kjo një rastësi?
Apo sistemi është lënë në mëshirë të fatit?
Pas aksionit të SPAK në AKSHI, infrastruktura dixhitale duket se po lëkundet çdo javë. Bizneset nuk kryejnë dot aplikime, procedura prokurimi, regjistrime, deklarime tatimore. Ekonomia paralizohet me një klikim të dështuar.
“Siguri kombëtare në rrezik”
Pak ditë më parë, Dhoma Amerikane e Tregtisë në Shqipëri ngriti alarmin se kolapsi i sistemeve dixhitale po cenon sigurinë kombëtare dhe klimën e biznesit.
Kur sistemi i prokurimeve bie,
kur të dhënat statistikore nuk aksesohen,
kur regjistrat e bizneseve bllokohen —
atëherë nuk kemi më thjesht një “problem IT”.
Kemi një krizë shtetërore.
Shqipëria dixhitale – propagandë apo realitet?
Qeveria e ka shitur për vite me radhë “Shqipërinë Dixhitale” si sukses model në rajon. Por realiteti i përditshëm i bizneseve është:
- Portale që nuk hapen
- Sisteme që bien në mes të afateve
- Heshtje totale nga institucionet
Në vend të stabilitetit, kemi improvizim.
Në vend të transparencës, kemi errësirë.
Në vend të sigurisë, kemi pasiguri.
Shqiptarët nuk meritojnë një shtet që bie sa herë ndërrohet drejtori.
Shteti nuk është server privat.
Administrata nuk është lodër propagande.
Koha e justifikimeve ka mbaruar.
Shqipëria nuk mund të mbahet peng nga paaftësia dixhitale.