Tirane – Oligarku i njohur i ndërtimit, Ram Geci, është futur në qendër të hetimeve nga Prokuroria e Posaçme Kundër Korrupsionit dhe Krimit të Organizuar (SPAK) për një seri tenderash të dyshimtë që kanë përfshirë miliona euro fonde publike.
Geci, i denoncuar prej vitesh nga mediat shqiptare si një prej oligarkëve që kanë përvetësuar një pjesë të madhe të Buxhetit të Shtetit, duket se ka përfituar përsëri nga klientelizmi dhe favorizimet e pushtetit. Sipas burimeve të SPAK, vetëm në pesë vitet e fundit, kompania e tij, Geci sh.p.k, ka përfituar nga buxheti i shtetit rreth 72–90 milionë euro, përmes procedurave ku ka pasur dyshime të forta për mungesë konkurrence reale dhe favorizim të hapur.
Hetimet e SPAK kanë fokusin e tyre tek disa tendera strategjikë, përfshirë edhe ndërtimin e rrugës “Porto Romano” në Durrës. Dokumentet e zbuluara tregojnë se pas vendimit për takimin e Gecit me zyrtarë të lartë qeveritarë qëndron një mesazh i drejtpërdrejtë nga zv/kryeministrja Belinda Balluku, e cila i thotë një bashkëpunëtori të saj:
“Kryeministri i kërkoi të takojë Ramë Gecin.”
Ky mesazh lidhet drejtpërdrejt me procedurat e mëtejshme të prokurimit për tenderin e rrugës, duke ngritur pyetje serioze për pavarësinë e procedurave publike dhe klientelizmin në nivel të lartë qeveritar.
Hetimet e SPAK po ndjekin me kujdes këtë rrjet favorizimesh, ndërsa oligarkë si Geci duket se vazhdojnë të përfitojnë mbi kurriz të taksapaguesve shqiptarë. Ky rast vjen si një tjetër sinjal i qartë i lidhjeve të ngushta midis oligarkëve dhe politikës, të cilat kanë dëmtuar buxhetin e shtetit dhe besimin publik në institucionet shqiptare.