Administrata e presidentit amerikan Donald Trump po intensifikon përpjekjet për të koordinuar një përgjigje ndërkombëtare ndaj asaj që e cilëson si ringjallje të ekstremizmit të majtë me lidhje ndërkombëtare. Në këtë kuadër, Departamenti amerikan i Shtetit ka dërguar në mesin e muajit qershor një telegram diplomatik në më shumë se 20 ambasada amerikane, mes tyre edhe në Tiranë, duke kërkuar informacion mbi grupet e ekstremit të majtë.
Sipas një raporti të publikuar nga The Washington Post, nisma paraprin një takim të ministrave të Jashtëm nga mbi 60 vende, i thirrur nga sekretari amerikan i Shtetit, Marco Rubio, i cili do të zhvillohet javën e ardhshme në Uashington.
Konferenca pritet të fokusohet në atë që administrata Trump e përshkruan si “ringjallja e terrorizmit transnacional të ekstremit të majtë”, por iniciativa ka shkaktuar reagime të ndryshme si brenda administratës amerikane, ashtu edhe te disa aleatë evropianë.
Sipas raportit, disa zyrtarë amerikanë kanë shprehur shqetësimin se administrata mund të përdorë instrumentet kundër terrorizmit për të goditur aktivistë amerikanë të lidhur me lëvizjen antifashiste Antifa.
Burime të gazetës bëjnë të ditur se koordinatori i administratës për luftën kundër terrorizmit, Sebastian Gorka, ka diskutuar mundësinë e klasifikimit të Antifa-s si organizatë e huaj terroriste. Një vendim i tillë do t’u jepte autoriteteve amerikane kompetenca më të gjera hetimore, përfshirë përdorimin e mjeteve të avancuara të mbikëqyrjes.
Megjithatë, ekspertë ligjorë dhe ish-zyrtarë të Departamentit të Shtetit theksojnë se një klasifikim i tillë do të përballej me pengesa serioze juridike. Sipas ligjit amerikan, një organizatë mund të shpallet organizatë e huaj terroriste vetëm nëse është e bazuar jashtë territorit të Shteteve të Bashkuara, ndërsa Antifa konsiderohet një rrjet i decentralizuar me aktivitet kryesisht brenda SHBA-së.
Raporti zbulon se telegrami diplomatik i Departamentit të Shtetit iu dërgua ambasadave amerikane në vende si Argjentina, Meksika, Italia dhe Shqipëria, duke kërkuar informacion mbi grupet e ekstremit të majtë. Sipas burimeve të cituara, disa ambasada kanë kthyer përgjigje, por asnjëra nuk ka konfirmuar vlerësimin e administratës se këto grupe përbëjnë një kërcënim të madh për sigurinë.
Ftesa për samitin u janë dërguar shumicës së vendeve evropiane, disa shteteve të Amerikës Latine, si dhe vendeve aziatike, përfshirë Indinë, Indonezinë dhe Singaporin.
Sipas The Washington Post, disa diplomatë evropianë janë shprehur të befasuar nga iniciativa, duke theksuar se në vendet e tyre ekstremizmi i majtë nuk konsiderohet një kërcënim kryesor për sigurinë kombëtare. Madje, disa prej tyre kanë lënë të kuptohet se ministrat përkatës mund të mos marrin pjesë në takimin e 16 korrikut për shkak të angazhimeve të tjera diplomatike.
Takimi në Uashington pritet të shërbejë si një tjetër tregues i ndryshimit të qasjes së administratës Trump ndaj çështjeve të sigurisë dhe terrorizmit, ndërsa debati mbi mënyrën e trajtimit të lëvizjeve radikale politike vijon të mbetet i fortë si në Shtetet e Bashkuara, ashtu edhe mes aleatëve të saj.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
