Nga Redaksia – Një tjetër rast i rëndë që trondit besimin e qytetarëve në institucionet financiare dhe kontrollin shtetëror është zbuluar nga strukturat e Krimit Ekonomik në Policinë e Tiranës, ku në qendër të hetimeve ndodhen drejtues të një dege të UBA Bank.
Sipas hetimeve të Prokurorisë së Tiranës, drejtori i degës, Gilbert Hoxha, dhe zv.drejtori, Albin Keta, dyshohen se kanë shpërdoruar detyrën dhe aksesin në sistemin bankar për të përvetësuar fonde nga llogaritë e klientëve, përmes skemave të ndryshme të manipulimit financiar.
Hetimet paraprake flasin për një mekanizëm të organizuar që përfshinte:
- mandate të rreme për tërheqje parash
- ndërhyrje në sistemin bankar
- konvertime valutore të paautorizuara
- hapje dhe mbyllje depozitash pa dijeninë e klientëve
Deri më tani, dëmi i dokumentuar nga hetuesit llogaritet në mbi 200 mijë euro, ndërsa dyshohet se shuma mund të rritet gjatë verifikimeve të mëtejshme.
Në kuadër të të njëjtit hetim, Gjykata ka vendosur:
- “arrest në shtëpi” për 6 punonjëse të bankës, të cilat dyshohet se kanë bashkëpunuar në manipulimin e të dhënave dhe transaksioneve financiare
- “pezullim nga detyra” për 4 punonjës të tjerë, për shkak të dyshimeve për shkelje të procedurave bankare që kanë krijuar kushtet për abuzime
Hetimi përfshin emrat: Griselda Bana, Dorisa Doka, Oksana Kadiu, Resmije Stafa, Blerta Nelaj, Zhaklina Buçpapaj, si dhe Elona Qose, Iva Dollaku, Ensuida Keci dhe Bjorn Mazniku.
Rasti ka nisur pas kallëzimeve të disa qytetarëve, të cilët kanë konstatuar mungesa të konsiderueshme në llogaritë e tyre bankare.
Një prej rasteve të dokumentuara lidhet me tërheqje të paautorizuara në vlerën e 500 mijë lekëve nga tre llogari të një klienti. Ndërkohë, edhe vetë banka ka bërë një denoncim të veçantë për një rast të ngjashëm.
Sipas Prokurorisë, janë identifikuar të paktën 30 transaksione të dyshuara të kryera pa mandat, si dhe hapje e mbyllje depozitash në valuta të huaja pa miratimin e klientëve.
Autoritetet theksojnë se numri i personave të dëmtuar mund të jetë më i madh, ndërsa verifikimet po vijojnë për të zbuluar plotësisht skemën e dyshuar të mashtrimit financiar dhe të gjithë personat e përfshirë.
Në një kohë kur qytetarët kërkojnë siguri dhe transparencë në sistemin bankar, ky rast ngre edhe një herë pikëpyetje serioze mbi kontrollin institucional dhe mekanizmat e mbikëqyrjes financiare në vend.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.