Nga Redaksia – Ngjarja e mbrëmjes së djeshme në Tiranë, ku u shoqërua nga policia avokati Altin Goxhaj, po merr përmasa të reja, pasi vetë ai ka bërë një denoncim të fortë publik për dhunë të ushtruar gjatë arrestimit.
Sipas versionit zyrtar të Policisë së Shtetit, Goxhaj u shoqërua në Komisariatin Nr. 2 pas një përplasjeje me efektivët dhe akuzohet për “mosbindje ndaj urdhrit të punonjësit të policisë”, pas një incidenti të ndodhur në rrugën “Kavajës”.
Por versioni i avokatit është krejt ndryshe dhe shumë më i rëndë.
Në një reagim publik, i shoqëruar edhe me video, Goxhaj deklaron se gjatë arrestimit ndaj tij është ushtruar dhunë fizike përmes shtrëngimit të fortë të prangave, duke i shkaktuar dëmtime në kyçet e duarve.
“Kur vendosen prangat nuk synojnë të të dëmtojnë duart. Rasti kur sjellin dëmtime është vetëm kur të shtrëngohen qëllimisht,” – shprehet ai.
Sipas tij, dëmtimet janë konstatuar edhe nga Oficeri i Policisë Gjyqësore, i cili i ka dokumentuar dhe ka kërkuar përgatitjen e një raporti mjeko-ligjor — një provë e rëndësishme që mund të ketë pasoja ligjore për efektivët e përfshirë.
Më tej, Goxhaj konfirmon se ka kryer edhe ekzaminimin tek mjeku ligjor, ku janë evidentuar plagët në kyçe, të cilat ai i lidh drejtpërdrejt me shtrëngimin e prangave nga një efektiv policie.
Në deklaratën e tij, ai përdor tone të ashpra, duke akuzuar efektivin për përdorim të qëllimshëm të dhunës me synimin për ta detyruar të heshtë përmes dhimbjes fizike. Ai ironizon edhe situatën gjatë kontrollit mjeko-ligjor, duke theksuar se dëmtimet ishin të përqendruara vetëm në duar.
Më poshtë mund të lexoni:
Sipas tij, një veprim i tillë, në bazë të legjislacionit në fuqi, kategorizohet si “torturë” dhe përbën vepër penale të rëndë.
Ngjarja bëhet edhe më e ndjeshme për shkak të kontekstit të saj: fillimisht pati edhe dyshime publike për një “rrëmbim”, pasi për disa orë nuk kishte informacion të qartë mbi vendndodhjen e tij, derisa më pas u konfirmua se ndodhej në ambientet e Komisariatit Nr. 2.
Publikimi i videos dhe raporti mjeko-ligjor pritet të jenë elementë kyç në zbardhjen e plotë të kësaj ngjarjeje, e cila ka hapur debat të fortë mbi kufijtë e përdorimit të forcës nga policia dhe respektimin e të drejtave të qytetarëve.
Rasti i Avokatit Goxhaj tashmë nuk është më thjesht një shoqërim policor, por një çështje që mund të shndërrohet në një precedent serioz për trajtimin e dhunës policore në Shqipëri.