Nga Redaksia:
Presidenti i Rusisë, Vladimir Putin, gjatë sesionit plenar të Forumit Valdai deklaroi se rendi i ri multipolar botëror është pasojë e përpjekjeve të vendeve perëndimore për të vendosur hegjemoninë globale. Sipas tij, bota po kalon në një fazë transformimi dhe çdo vend duhet të jetë i përgatitur për ndryshime të mëdha.
Kreu i Kremlinit theksoi avancimet e ushtrisë ruse në frontin e luftës dhe humbjet e rënda të Kievit, ndërsa u bëri thirrje elitave politike europiane të merren me problemet e vendeve të tyre përpara se të ushqejnë histerinë anti-ruse. Nga ana tjetër, ai vlerësoi qasjen më pragmatike të administratës së re amerikane ndaj çështjeve ndërkombëtare.
Bota e re dhe mungesa e përcaktueshmërisë
Putini tha se situata globale, e shënuar nga ndryshime të shpejta e shpesh dramatike, kërkon gatishmëri dhe përgjegjësi individuale:
“Asgjë nuk është e paracaktuar. Çdo gjë mund të zhvillohet në mënyra të ndryshme. Shumëçka varet nga maturia dhe përmbajtja e aktorëve ndërkombëtarë.”
Ai nënvizoi se bota multipolare është tashmë një realitet dhe se askush nuk është i gatshëm të pranojë “rregulla të vendosura diku përtej oqeanit.” Marrëdhëniet e reja ndërkombëtare sipas tij bazohen mbi pragmatizëm, realizëm dhe refuzim të filozofisë së blloqeve.
Organizata të reja si BRICS dhe SCO, sipas Putinit, po zhvillohen në frymën e diplomacisë së shekullit XXI:
“Ato nuk janë kundër askujt, por për veten e tyre.”
Humbja e hegjemonisë perëndimore
Putini theksoi se fuqia e SHBA-së dhe aleatëve të saj arriti kulmin në fund të shekullit XX, por dështoi të mbajë botën nën kontroll:
“U bënë përpjekje për të sunduar botën, por të gjitha përfunduan në dështim.”
Ai akuzoi politikanët europianë për nxitje histerie anti-ruse dhe përpjekje për ta paraqitur Moskën si armikun kryesor për të mbuluar dështimet e tyre të brendshme:
“Elitat europiane përsërisin pa pushim mantrën e luftës me rusët, por kjo është thjesht një marrëzi. Duhet të qetësohen dhe të merren me problemet e tyre.”
Sipas tij, militarizimi i Europës është në rritje dhe Rusia nuk do të vonojë me kundërmasat e saj.
Konflikti në Ukrainë
Putini akuzoi Europën për përshkallëzimin e konfliktit dhe përdorimin e ukrainasve si “material i harxhueshëm” për interesat e Perëndimit.
Ai tha se ushtria ruse po avancon hap pas hapi në front, duke krijuar një “zonë buffer” dhe duke marrë nën kontroll territore kyçe: Kupyansk, Kirovsk, Yunakovka, Volchansk, Seversk, Konstantinovka dhe Krasnoarmeysk.
“Sot ushtria ruse është më e gatshme për luftë se kurrë. Humbjet ekzistojnë, por janë shumë më të pakta se ato të ushtrisë ukrainase.”
Putini pretendoi se vetëm në muajin shtator, ushtria ukrainase ka humbur rreth 44,700 trupa, ndërsa nga janari deri në gusht kanë dezertuar mbi 150 mijë ushtarë.
Ai shtoi se “ka konfuzion në radhët e ushtrisë ukrainase” dhe se Kremlini ende shpreson që Kievi të ulet në tryezën e bisedimeve.
Marrëdhëniet Rusi – SHBA
Putini theksoi se pavarësisht kundërshtive mes Moskës dhe Uashingtonit, ekziston gjithmonë mundësia për zgjidhje që kënaqin të dyja palët:
“Çfarëdo mosmarrëveshjesh që të kemi, nëse i trajtojmë njëri-tjetrin me respekt, edhe negociatat më të ashpra e më të gjata do të synojnë një konsensus. Dhe kjo do të thotë se zgjidhjet e pranueshme reciprokisht janë të mundshme.”
Ai vuri në dukje se autoritetet aktuale amerikane shprehin hapur interesat e tyre, pa hipokrizi të panevojshme:
“Është gjithmonë më mirë të kuptosh qartë se çfarë kërkon pala tjetër, sesa të përpiqesh të lexosh mes rreshtave me gjysmëfjalë, paqartësi e aluzione të mjegullta.”
Sipas Putinit, administrata aktuale amerikane udhëhiqet para së gjithash nga interesat kombëtare të SHBA-ve, gjë që përbën një qasje më realiste.
Takimi në Alaska dhe roli i Trumpit
Në vizitën e zhvilluar në Alaska u diskutua edhe për mundësinë e rikthimit të marrëdhënieve dypalëshe, të cilat, siç tha Putin, “nuk janë vetëm në ngërç, por në nivelin më të ulët të gjithë kujtesës së afërt.”
Kreu i Kremlinit e përshkroi Donald Trump-in si një bashkëbisedues të këndshëm:
“Ai di të dëgjojë dhe të kuptojë.”
Putini deklaroi se Rusia është e gatshme të mbështesë propozimin e presidentit Trump për zgjidhjen e konfliktit në Rripin e Gazës, nëse kjo nismë do të çojë në krijimin e dy shteteve të veçanta, gjë që ai e quajti “çelësi i zgjidhjes përfundimtare të konfliktit palestinezo–izraelit.”
Në lidhje me deklaratën e Trumpit ku Rusia u quajt “tigër prej letre”, Putin tha se kjo duhet parë më tepër në mënyrë ironike.
Ky fjalim i Putinit në Forumin e Valdait shihet si një mesazh i qartë për fundin e hegjemonisë perëndimore dhe konsolidimin e rendit të ri multipolar ku Rusia, Kina dhe vendet e BRICS po marrin gjithnjë e më shumë peshë./TASS
Ky material është pronë e Patriotikmedia.al dhe është i mbrojtur nga ligjet për të drejtën e autorit. Ndalohet riprodhimi, apo publikimi i plotë apo i pjesshëm i këtij materiali pa lejen e shkruar paraprakisht nga redaksia. Shkelësit do të përballen me pasojat ligjore sipas legjislacionit në fuqi.