By redaksia 
Nga Redaksia:
Në një kohë kur industria farmaceutike globale dhe institucionet shëndetësore ndërkombëtare po akuzohen gjithnjë e më shumë për manipulim të shkencës në funksion të fitimeve miliardëshe, një përplasje e fortë ka shpërthyer në Shtetet e Bashkuara mes Sekretarit të Shëndetësisë, Robert F. Kennedy Jr., dhe revistës mjekësore prestigjioze “The Annals of Internal Medicine”.
Revista ka refuzuar të tërheqë një studim danez që pretendon se adjuvantët e aluminit në disa vaksina nuk rrisin rrezikun e sëmundjeve tek fëmijët, pavarësisht kërkesës së Kennedy-t, i cili e cilëson atë si një “mashtrim propagande të industrisë farmaceutike”.
Studimi, i publikuar në korrik dhe i financuar nga qeveria daneze, analizoi të dhënat e 1.2 milion fëmijëve përgjatë dy dekadave, duke mos gjetur prova për lidhje mes aluminit dhe sëmundjeve autoimune, alergjive apo çrregullimeve neuro-zhvillimore.
Kennedy: “Studimi u dizenjua për të fshehur dëmet”
Në një artikull të botuar më 1 gusht në TrialSite News, Kennedy akuzoi autorët se nuk përfshinë një grup kontrolli të përshtatshëm, përjashtuan fëmijët me ekspozim më të lartë ndaj aluminit, refuzuan ofrimin e të dhënave të papërpunuara për verifikim të pavarur.
Autorët mbrojnë punën e tyre
Autori kryesor, Anders Peter Hviid nga Instituti Statens Serum, tha se vetëm 2% e fëmijëve në Danimarkë janë të pavaksinuar – një numër i pamjaftueshëm për analiza të sakta statistikore. Ai shtoi se ligjet daneze ndalojnë publikimin e të dhënave individuale dhe se dizajni bazohej në studime të mëparshme, disa prej të cilëve kanë gjetur efekte negative.
Revista pranon kufizime, por jo manipulim
Kryeredaktorja Dr. Christine Laine pranoi se studimi ka kufizime metodologjike që mund të debatohen, por theksoi se ato nuk e zhvlerësojnë përfundimin kryesor: “Nuk ka arsye për të tërhequr studimin.”
Axhenda e Kennedy-t: Shëndeti i fëmijëve para fitimeve
Kennedy, i emëruar nga Presidenti Donald Trump, po shtyn përpara një plan kombëtar për uljen drastike të sëmundjeve kronike tek fëmijët, duke akuzuar sistemin shëndetësor se pasurohet duke mbajtur njerëzit të sëmurë.
Në raportin e tij MAHA: T’i Bëjmë Fëmijët Tanë të Shëndetshëm Përsëri, ai fajëson toksinat mjedisore, ushqimet ultra të përpunuara dhe disa aditivë në ilaçe e vaksina për rritjen dramatike të autizmit, alergjive dhe diabetit tek fëmijët.
“Sot, më shumë se 60% e fëmijëve në Amerikë kanë sëmundje kronike, kur në vitet 1960 kjo shifër ishte vetëm 3%,” – deklaroi Kennedy.
Për momentin, Annals of Internal Medicine do të publikojë vetëm një përgjigje në faqen e saj, pa iu referuar drejtpërdrejt artikullit të Kennedy-t, ndërsa Departamenti Amerikan i Shëndetësisë nuk ka dhënë koment shtesë.
Një betejë që tejkalon kufijtë e Amerikës
Rasti Kennedy kundër studimit danez është vetëm një kapitull i luftës globale për kontrollin e informacionit mjekësor. Kritikat ndaj industrisë farmaceutike tregojnë se shumë nga vendimet dhe politikat shëndetësore nuk merren më në baza të pastra shkencore, por në tryezat e korporatave ndërkombëtare dhe organizatave globale që shpesh kanë ndikim të drejtpërdrejtë mbi qeveritë. Për shumë analistë të pavarur, kjo përplasje nuk ka të bëjë vetëm me një studim të aluminit, por me të drejtën e popujve për të pasur një mjekësi të ndershme, transparente dhe të pavarur nga interesat e miliarderëve.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.