By redaksia 
Nga Redaksia:
Varësia nga rrjetet sociale po e kthen njeriun në robot
Që nga shkurti i vitit 2025, 5.56 miliardë njerëz në mbarë botën janë përdorues të internetit – që do të thotë rreth 68% e njerëzimit është e lidhur në mënyrë të përhershme me rrjetin. Nga këta, 5.24 miliardë janë aktivë në rrjetet sociale, duke kaluar orë të tëra përballë ekranit dhe duke jetuar në një realitet virtual, që ngadalë ka nisur të zëvendësojë realitetin e vërtetë.
Nga njerëz me ndjenja në përdorues të varur
Globalizmi na premtoi lirë, liri dhe lidhje. Por ajo që po ndodh në fakt është kontroll, manipulim dhe robotizim i ndërgjegjes njerëzore.
Njeriu po kthehet në përdorues, në ndjekës, në produkt – jo më në krijues, as në qenie e lirë.
Sot, fëmijët mësojnë të bëjnë “swipe” para se të mësojnë të shkruajnë.
Miqësitë maten me “likes”.
Dashuria konvertohet në “story”.
Mendimet e ndryshe censurohen me butonin “raporto”.
Të vërtetat e dhimbshme shpallen dezinformim.
Globalizmi që na përpiu me gjithë lecka
Ne shqiptarët, që jemi popull me ndjenja të forta, lidhje familjare, mikpritje dhe traditë, po i zëvendësojmë këto me trende virale, sfida pa kuptim, filtra false dhe influencerë bosh.
Na u tha se do të jemi të lirë, por sot jemi më të varur se kurrë:
Nuk jetojmë për të përjetuar, por për të postuar.
Nuk komunikojmë më ballë për ballë, por me emoji.
Nuk e njohim më fqinjin, por dimë çdo lëvizje të një “influenceri” në Dubai.
Kur truri pushon së menduari dhe fillon të skedojë
Varësia ndaj rrjeteve sociale nuk është më thjesht problem psikologjik – është strategji e dizenjuar mirë për të mbajtur popujt të zënë me “gjëra pa rëndësi”, ndërkohë që pasuria, liria dhe vlerat na vidhen nën hundë.
Në vend që të protestojmë, bëjmë reels.
Në vend që të informohemi, bëjmë scroll.
Në vend që të flasim, heshtim nga frika se mos na mbyllin llogaritë.
Zgjimi fillon duke fikur ekranin
Duhet të kujtojmë se nuk jemi robotë, por bij dhe bija të një kombi të lashtë, që ka mbijetuar shekuj me shpirt, jo me algoritëm.
Të shkëputemi, të mendojmë, të ndjejmë dhe të flasim si shqiptarë, jo si “followers” të kulturës së zhbërjes globale.
Sepse në fund, liria e vërtetë nuk vjen nga lidhja me rrjetin, por nga shkëputja prej tij kur bëhet kancer për shpirtin.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.