Mesazhi i aktores: Mos kini frikë! Problemi i Shqipërisë nuk është një karrige pushteti, por dinjiteti dhe e ardhmja e qytetarëve ...

Nga Egla Ceno:

Në një mesazh drejtuar qytetarëve, Egla Ceno u bën thirrje shqiptarëve të mos bien pre e frikës dhe manipulimeve, por të vazhdojnë të kërkojnë të drejtat e tyre dhe të reagojnë për problemet që prekin çdo ditë shoqërinë shqiptare.

Sipas Cenos, ajo që po ndodh është një përpjekje për të zhvendosur vëmendjen nga problemet reale të qytetarëve. Ajo sjell si shembull Spanjën, ku, sipas saj, është miratuar një normativë që parashikon mbështetje ekonomike për gratë në menopauzë, duke nisur nga 1 dhjetori.

Përmes këtij krahasimi, Egla Ceno ngre një pyetje të fortë për mënyrën se si trajtohen qytetarët në Shqipëri dhe për standardin e jetesës që duhet të garantojë një shtet.

Ajo u bën thirrje qytetarëve të mos heshtin dhe të mos kenë frikë të dalin për pensionistët, jetimët, personat me aftësi të kufizuara, për spitalet, pagat, çmimet, shëndetësinë dhe luftën kundër korrupsionit.

Por lista e shqetësimeve nuk përfundon këtu. Ajo përfshin meritokracinë, transportin hekurudhor, urbanin, hapësirat e përbashkëta, furnizimin me ujë dhe energji elektrike, industrinë, bujqësinë, shkollat, universitetet dhe, mbi të gjitha, dinjitetin e qytetarëve.

“Po të ishim spanjollë, nuk do të merreshim me këto hallet ‘luksoze’ që ka kjo qeveri, do të ishim të shërbyer, të respektuar, me dinjitet!”, shprehet Ceno.

Në mesazhin e saj, ajo thekson se beteja e qytetarëve nuk duhet parë si një përplasje për një karrige pushteti apo për personin që ulet në të. Sipas saj, çështja është shumë më e thellë dhe prek vetë kushtet e ekzistencës së qytetarëve, të ardhmen e tyre dhe të brezave që vijnë.

Problemi ynë nuk është një karrige dhe byça që ulet në të, problemi ynë është ekzistencial.

Ky është thelbi i mesazhit të Egla Cenos: qytetarët duhet të kërkojnë një shtet që u shërben atyre, jo një shoqëri ku njerëzit duhet të luftojnë çdo ditë për të drejtat dhe shërbimet më elementare.

Dhe mesazhin e saj e mbyll me një thirrje të drejtpërdrejtë:

“Përpara, mos u ndalni! Pushteti duhet t’i shërbejë qytetarit. Kaq.”