Nga Redaksia – Avokati Altin Goxhaj ka reaguar ashpër për mënyrën se si po zhvillohen disa prej akteve të protestës, duke deklaruar se është hapur pro përshkallëzimit dhe mosbindjes civile, por kundër bllokimit të rrugëve që, sipas tij, penalizon qytetarët e zakonshëm.
Në një reagim të gjatë, Goxhaj argumenton se mosbindja civile nuk duhet të kthehet në një përplasje me qytetarët që nuk janë pjesë e protestës.
“Jam pro përshkallëzimit, pro mosbindjes civile! Dhjetra e qindra orë që e shpjegoj!”, shprehet ai, duke shtuar se është kundër bllokimit të rrugëve vetëm për t’i mbajtur qytetarët të bllokuar në trafik, veçanërisht prindërit që çojnë fëmijët në shkollë.
Sipas Goxhajt, objektivi i drejtpërdrejtë i mosbindjes civile duhet të jetë pushteti dhe institucionet e tij.
“Jam për t’i blloku hyrjet e Kryeministrisë dhe Kuvendit dhe sa herë të ketë seanca edhe Parlamentit!”, shkruan ai.
“Bllokimi i rrugëve nuk është mosbindje civile”
Avokati e konsideron bllokimin e rrugëve, në kushtet kur pjesëmarrësit në protestë janë të paktë, si një strategji të gabuar.
“‘Bllokimi i rrugëve’ në emër të gjoja ‘mosbindjes civile’ është naivitet dhe mosnjohuri se çfarë do të thotë mosbindje civile në rastin më të mirë!”, deklaron Goxhaj.
Ai argumenton se bllokimi masiv i rrugëve është rezultat i një proteste që tashmë ka marrë përmasa të mëdha dhe jo një objektiv më vete.
Sipas tij, kur qindra mijëra qytetarë mbushin rrugët dhe sheshet, bllokimi i qarkullimit bëhet një pasojë e natyrshme e masivizimit të protestës.
Por kur pjesëmarrësit janë të paktë, Goxhaj propozon një tjetër strategji: presion të drejtpërdrejtë ndaj institucioneve.
“Kur je veç një grusht, shko blloko hyrjet e Kryeministrisë dhe Kuvendit!”, shkruan ai.
Më poshtë mund të lexoni:
Akuzat për “skenar policor”
Në pjesën më të ashpër të reagimit të tij, Goxhaj ngre akuza për mënyrën se si, sipas tij, është përdorur bllokimi i rrugëve si justifikim për ndërhyrjen e policisë.
Ai pretendon se bllokimi i rrugëve, i nisur sipas tij një javë më parë, u përdor si “pretekst policor” për shoqërimin e marshimit pas protestës.
Sipas tij, justifikimi i policisë ishte shmangia e një përplasjeje të mundshme mes “qytetarëve” dhe “protestuesve”, duke krijuar kështu, në gjuhën e tij, një ndarje artificiale mes dy palëve.
Goxhaj përmend edhe episode të pretenduara me drejtues automjetesh të acaruar, duke i cilësuar ato si pjesë të një skenari që, sipas tij, shërbeu për të legjitimuar ndërhyrjen policore.
Më poshtë mund të lexoni:
“Bllokimi i rrugëve është akt dëshpërimi”
Një nga mesazhet kryesore të reagimit të tij është se protesta duhet të synojë institucionet e pushtetit dhe jo qytetarët.
“Bllokimi i rrugëve është akt dëshpërimi pse je pak dhe harron që shkrihesh dhe bëhesh aspak!”, shkruan Goxhaj.
Ai sjell si shembull edhe mesazhin që, sipas tij, u kishte dhënë diasporës: të bllokoheshin hyrjet e Kryeministrisë dhe Kuvendit të hënën në mëngjes dhe jo rrugët ku lëvizin qytetarët.
“Bllokoni hyrjet e Kryeministrisë dhe Kuvendit të hënën në mëngjes, JO RRUGËT KUNDËR QYTETARËVE!!!”, shkruan ai.
Goxhaj thekson se pikërisht sot Kryeministri Edi Rama kishte zhvilluar një mbledhje pranë Kuvendit, duke e përdorur këtë si shembull për të argumentuar se protesta mund të përqendrohet drejtpërdrejt pranë institucioneve.
Më poshtë mund të lexoni:
Kritika ndaj drejtimit të protestës
Në vijim të reagimit, Goxhaj përdor një gjuhë tepër të ashpër ndaj personave që, sipas tij, po ndikojnë në drejtimin e protestës. Ai përmend me nofka disa prej tyre dhe ngre pikëpyetje mbi koordinimet e mundshme mes tyre.
Ai rikthen gjithashtu në vëmendje zhvillimet e protestave të muajit gusht dhe pretendon se disa prej personave që sot janë të përfshirë në protestë kanë pasur rol në episodet e dhunës së asaj periudhe.
“Ne jemi popull me memorie peshku, harrojmë shpejt çdo gjë”, shkruan Goxhaj, duke kërkuar që protestuesit të mos harrojnë zhvillimet e mëparshme dhe të bëjnë pyetje mbi atë që ai e quan “rastësi”.
Reagimi i avokatit vjen në një moment kur protesta dhe mënyra e organizimit të saj po shoqërohen me debate të forta edhe brenda vetë kampit opozitar dhe protestues.
Në thelb, mesazhi i Goxhajt është i qartë: mosbindje civile po, përshkallëzim po, por objektivi duhet të jetë pushteti dhe institucionet e tij, jo qytetari i zakonshëm që ndodhet në rrugë.
Në fund të reagimit, Goxhaj sqaron edhe mungesën e tij gjatë ditës së sotme, duke thënë se nuk ka mundur të jetë pjesë e protestave apo podcasteve për shkak të gjendjes së tij shëndetësore dhe mungesës së zërit.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
