ANALIZA: Tradhëtia po del hapur – Zvarritja e protestës është e qëllimshme, shqiptarët kërkojnë veprime konkrete dhe jo më fjalë!

Nga Redi Minga:

Shansi i madh që patën shqiptarët për t’i dhënë një goditje të fortë establishmentit politik Rama-Berisha ishte momenti kur protesta nisi në fund të majit dhe gjatë muajit qershor. Ishte një mundësi për të kthyer pakënaqësinë qytetare në një lëvizje të fuqishme kundër një sistemi që prej 36 vitesh vazhdon të mbajë peng vendin.

Por çfarë ndodhi? Shqiptarët u zhgënjyen edhe një herë. U tradhtuan, ashtu siç janë tradhtuar vazhdimisht gjatë këtyre viteve.

E njëjta histori u përsërit edhe me lëvizjen studentore. Një tjetër mundësi për të krijuar një ndryshim të vërtetë, e cila u shoqërua me mungesë mbështetjeje dhe me një indiferencë të dhimbshme nga një pjesë e prindërve të studentëve. Një situatë që të kujton protestat studentore të vitit 2018, kur edhe atëherë energjia e rinisë nuk arriti të prodhonte ndryshimin e shumëpritur.

Ku përfunduan patriotët e rrjeteve sociale?

Një tjetër fenomen që ka rënë në sy është zhdukja nga qarkullimi e shumë personazheve që deri dje prezantoheshin si patriotë, revolucionarë dhe luftëtarë kundër sistemit. Sot, shumë prej tyre janë tërhequr në heshtje dhe kanë rifilluar jetën e tyre të zakonshme.

Kjo të ngre pikëpyetje serioze: ku përfundoi gjithë ajo vendosmëri? Ku janë njerëzit që premtonin se do ta çonin protestën deri në fund? A u shua vullneti i tyre apo u arritën marrëveshje dhe përfitime që i larguan nga beteja?

Nuk po pretendojmë se kemi prova për marrëveshje të tilla, por heshtja dhe zhdukja e disa prej figurave që deri dje ishin në rreshtat e parë kërkojnë shpjegime publike.

Dikush mund të ndihet i revoltuar nga këto që po themi, por e vërteta nuk mund të fshihet pas emocioneve. Nuk mund t’i themi të bardhës të zezë dhe të zezës të bardhë.

Është naive të besohet se një sistem i konsoliduar politik rrëzohet vetëm me parrulla si: “Rama, jep dorëheqjen!”. Një establishment që ka ndërtuar mekanizmat e tij të pushtetit nuk largohet me thirrje në mikrofon dhe me deklarata në rrjetet sociale.

Ku është plani konkret i protestës?

Establishmenti politik duket se e ka gjetur përsëri mënyrën për të neutralizuar pakënaqësinë qytetare: përmes zvarritjes, përçarjes dhe mungesës së një strategjie të qartë.

Është e habitshme të shohësh njerëz që flasin pa pushim në rrjetet sociale dhe në podcast-e, por që deri më sot nuk kanë arritur të tregojnë se çfarë ndikimi real kanë në terren.

Shqiptarët nuk kanë më nevojë për orë të tëra fjalimesh, analiza dhe premtime. Ata kanë nevojë për një plan konkret, objektiva të qarta dhe veprime që mund të maten.

Ideja e 28 Nëntorit, e paraqitur si një tjetër datë e rëndësishme për protestën, ngre pikëpyetje të forta. A është kjo një strategji e re apo thjesht një tjetër shtyrje që e mban gjallë pritshmërinë, ndërsa energjia e qytetarëve vazhdon të shuhet?

Establishmenti 36-vjeçar nuk është një strukturë që dorëzohet duke pritur. Ai ka mekanizma politikë, ekonomikë dhe mediatikë për të mbrojtur interesat e veta. Ndërsa qytetari i zakonshëm lufton çdo ditë për të mbyllur muajin, ata që kanë pushtetin vazhdojnë lojën e tyre politike.

Ku përfunduan pesë pikat që u shpallën në mikrofon? Pse gjithçka u shua në heshtje? Ku janë veprimet konkrete? Ku është mobilizimi i studentëve? Pse protesta u kthye sërish në shëtitje nga sheshi Skënderbej drejt Bulevardit “Dëshmorët e Kombit”?

Këto janë pyetje që meritojnë përgjigje, jo heshtje.

Zgjedhjet vendore të vitit 2027, një tjetër lojë e establishmentit?

Ndërkohë që qytetarët presin një strategji për ndryshim, skena politike duket se po përgatitet për një tjetër cikël zgjedhor.

Partia Demokratike ka nisur diskutimet për zgjedhjet vendore të 9 majit 2027. Disa deputetë kanë shprehur gatishmërinë për të lënë mandatin parlamentar dhe për të kandiduar për kryetarë bashkie, ndërsa mbetet e hapur çështja e formulës së bashkëpunimit me partitë e tjera opozitare.

Por këtu lind një tjetër pyetje thelbësore: a po përgatitet opozita për të ndryshuar sistemin apo thjesht për të zëvendësuar disa karrige me të tjera?

A mos vallë po shkojmë drejt një skenari ku e gjithë energjia e protestës do të kanalizohet në zgjedhjet e ardhshme, duke e lënë sërish në harresë kërkesën për ndryshim të vërtetë?

Shqiptarët kanë të drejtë të dyshojnë. Sepse për 36 vite kanë parë të njëjtën lojë politike, ku palët përplasen në publik, por sistemi vazhdon të mbijetojë.

Media dhe personazhet e ekranit, pjesë e problemit?

Një tjetër çështje që kemi ngritur edhe në artikujt e mëparshëm është roli i mediave në menaxhimin e pakënaqësisë qytetare.

Ne kemi paralajmëruar se NEWS24 nuk duhet parë automatikisht si një media që qëndron në anën e protestës vetëm sepse transmeton pamje apo intervista nga ajo. Çdo media duhet gjykuar përmes linjës editoriale, përzgjedhjes së të ftuarve dhe mënyrës se si trajton zhvillimet politike.

Sa herë që ka pasur zhvillime të forta, kemi parë personazhe të caktuara të marrin hapësirë të konsiderueshme në transmetimet live. Edhe gjatë protestës së njohur si protesta e flamingove, disa prej këtyre figurave u promovuan gjerësisht në ekran.

Kjo ngre pyetje për publikun: kush po merr kontrollin, kush po e përcakton mesazhin dhe kujt po i shërben ky ekspozim mediatik?

Nuk mjafton të dalësh në ekran dhe të prezantohesh si kundërshtar i sistemit. Duhet të tregosh me veprime se çfarë kërkon dhe çfarë je i gatshëm të bësh për kauzën që pretendon se përfaqëson.

Shqiptarët duhet të kërkojnë llogari, jo të presin pafund!

Protesta nuk mund të matet vetëm me numrin e njerëzve që dalin në shesh. Ajo dobësohet edhe nga mungesa e organizimit, nga përçarjet, nga mesazhet kontradiktore dhe nga mungesa e një strategjie të besueshme.

Nëse dikush pretendon se përfaqëson revoltën qytetare, duhet të japë llogari për vendimet, premtimet dhe rezultatet.

Mjaft më me justifikime! Mjaft më me data që shtyhen, me premtime që përsëriten dhe me fjalime që nuk prodhojnë asgjë konkrete.

Shqiptarët duhet të kuptojnë se jo kushdo që përdor flamurin kombëtar, fjalën patriotizëm apo retorikën kundër korrupsionit është domosdoshmërisht në anën e tyre. Besimi duhet fituar me transparencë dhe përgjegjësi.

Gati gjashtë muaj me fjalë, deklarata dhe premtime janë më se të mjaftueshme.

Koha ka ardhur që qytetarët të kërkojnë një plan të qartë, objektiva të matshme, transparencë dhe përgjegjësi nga kushdo që pretendon se udhëheq protestën.

Sepse Shqipëria nuk ka nevojë për një tjetër spektakël politik. Ka nevojë për ndryshim të vërtetë.

Dhe pyetja që duhet t’i bëhet sot çdo organizatori të protestës është e thjeshtë: KU ËSHTË PLANI DHE KUR DO TË SHOHIM VEPRIME KONKRETE?

© Copyright of PatriotikMedia.al

Back To Top