Nga Redaksia – Studentët e Universitetit “Aleksandër Moisiu” në Durrës janë përfshirë në një protestë në pritje të kryeministrit Edi Rama, i cili pritet të zhvillojë një takim me të rinjtë.
Protesta ka nisur në ambientet ku pritet të zhvillohet takimi me kreun e qeverisë, ndërsa policia ka ndërhyrë duke i larguar studentët nga zona.
Protesta vjen në nisje të vitit të ri akademik, në një kohë kur transporti dhe akomodimi vijojnë të jenë ndër problematikat kryesore për studentët e UAMD-së.
Mijëra të rinj ndjekin studimet në kampusin e Spitallës, ndërsa një pjesë e tyre udhëtojnë çdo ditë nga Tirana drejt Durrësit. Për studentët që përshkojnë këtë distancë çdo ditë, transporti mbetet një prej shqetësimeve të vazhdueshme.
Pikërisht këto problematika janë rikthyer në vëmendje në nisje të vitit të ri akademik, ndërsa studentët kanë zgjedhur protestën në momentin kur kryeministri pritet të takohet me të rinjtë e universitetit.
Ndërhyrja e policisë për largimin e studentëve nga ambientet ku pritet të zhvillohet takimi është bërë pjesë e situatës së krijuar në kampus.
Tashmë pritet të shihet nëse shqetësimet e studentëve për transportin, akomodimin dhe kushtet e studimit do të marrin përgjigje gjatë takimit me kryeministrin Edi Rama.
© Copyright of PatriotikMedia.al
