PRISHTINE – Qeveria e Kosovës ka miratuar nismën legjislative për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar, duke iu përgjigjur kërkesës së Kuvendit të Kosovës.
Vendimi u mor gjatë një mbledhjeje elektronike të zhvilluar pasditen e së premtes, ku qeveria miratoi përgjigjen zyrtare lidhur me projektligjin e propozuar për ndryshimin e kuadrit ligjor që rregullon funksionimin e Dhomave të Specializuara.
Sipas njoftimit zyrtar të qeverisë, vendimi i përgjigjet kërkesës së Kuvendit të Republikës së Kosovës, me numër protokolli 1108, të datës 23 shtator 2026. Vlerësimi përfshin opinionin ligjor mbi përputhshmërinë me acquis të Bashkimit Evropian, ndikimin buxhetor dhe opinionin ligjor për përmbajtjen e projektligjit.
Nisma për ndryshimin e ligjit është ndërmarrë nga Partia Demokratike e Kosovës (PDK), pas vendimit të Gjykatës Speciale për dënimin e ish-krerëve të Ushtrisë Çlirimtare të Kosovës me gjithsej 81 vite burg.
Çështja e Gjykatës Speciale dhe trajtimi ligjor i proceseve ndaj ish-drejtuesve të UÇK-së kanë qenë në qendër të debatit politik në Kosovë, ndërsa iniciativa e PDK-së synon ndryshimin dhe plotësimin e ligjit që rregullon funksionimin e këtij institucioni.
Para miratimit të vendimit nga qeveria, kryeministri Albin Kurti dhe kryetari i PDK-së, Bedri Hamza, zhvilluan një takim ku ndër temat e diskutimit ishin ndryshimet ligjore për Dhomat e Specializuara dhe zgjedhja e presidentit të Kosovës.
Pas takimit, Hamza deklaroi se nuk ishte arritur ndonjë marrëveshje përfundimtare.
Miratimi i nismës nga qeveria përbën një hap në procedurën institucionale të projektligjit. Vijimi i procesit do të varet nga hapat e mëtejshëm parlamentarë dhe shqyrtimi i propozimeve për ndryshimin e ligjit.
© Copyright of PatriotikMedia.al
