Nga Redaksia – Një reagim i ashpër dhe pa doreza nga Egla Ceno ndaj kritikëve të saj në rrjetet sociale, pas deklarimeve të saj në mbështetje të protestës. Ceno u përgjigjet komentuesve që, sipas saj, kanë zhvendosur debatin nga protestat dhe problemet e vendit tek jeta e saj private.
Aktorja ka reaguar me tone të forta ndaj personave që kanë kritikuar publikisht qëndrimin e saj në mbështetje të protestës. Përmes një statusi në rrjetet sociale, ajo shprehet se nuk do të tërhiqet dhe se komentet personale ndaj saj nuk e ndryshojnë qëndrimin që ka marrë.
“Ju, mi gra dhe ju, mi burra, që keni shqyer gojën si çorap pas disa statuseve të mia pro protestës: unë protestoj, ju protestoni kundër protestës time”, shkruan Ceno.
Ajo kritikon ashpër komentuesit që, sipas saj, në vend që të diskutojnë për protestën, merren me jetën e saj personale, duke përmendur martesën, marrëdhëniet, paratë apo çështje të tjera private.
“Vini në profilin tim dhe shkruani: ‘jo e fitova, jo s’e fitova’, ‘mora 100 mijë euro’, ‘më zuri a s’më zuri filani’, ‘u martova a s’u martova’, ‘shterpë’, ‘e sëmurë’ etj. Vetëm kaq dini të thoni?”, shprehet ajo.
Ceno thotë se sulmet personale nuk e shqetësojnë dhe se nuk do t’u japë rëndësi atyre që, sipas saj, përdorin rrjetet sociale për të hedhur baltë mbi figura publike.
“Jeni aq shpifësira sa s’keni lënë profil vajzash të njohura pa hedhur baltë nga stallat e ndyra ku zhgërryheni si derra e dosa”, vijon reagimi i saj.
Në një pjesë tjetër të deklaratës, Ceno ndalet te jeta e saj private dhe kujton edhe periudhën kur ishte pjesë e një reality show. Ajo thekson se publiku ka mësuar vetëm atë pjesë të jetës së saj që ajo vetë ka zgjedhur të bëjë publike.
“Jeta ime private është aq private sa edhe nga ai reality show ku isha, morët vesh vetëm çfarë UNË doja të merrnit vesh nga jeta ime private”, shkruan ajo.
“Kam dy atdhe, dy flamuj në zemër dhe zero padron mbi kokë”
Një nga pjesët më të forta të reagimit lidhet me arsyen pse ajo thotë se mbështet protestën.
Aktorja Ceno deklaron se e mbështet protestën për shkak të bindjeve të saj dhe dashurisë për Shqipërinë, duke theksuar se nuk e bën këtë për interesa personale.
“Mbështes me gjithë zemër protestën sepse Shqipërinë e dua, jo sepse s’kam ku të shkoj. Sepse kështu më pëlqen dhe nuk i jap llogari njeriu”, shprehet ajo.
Duke iu përgjigjur kritikëve, ajo shton:
“Kam dy atdhe, dy flamuj në zemër dhe zero padron mbi kokë.”
Ceno thotë se protesta, sipas saj, duhet parë edhe si një përpjekje për të rikthyer dinjitetin dhe ndërgjegjësimin qytetar.
“Protestoj edhe për ju, të shikoni pak dinjitet me sy para se të ikni nga kjo botë”, shkruan ajo.
Në fund, aktorja u kërkon kritikëve të mos e përdorin profilin e saj për sulme dhe ofendime personale.
“Mos më bëni akoma pis profilin me praninë tuaj. Shpërndahuni, villni nëpër rrjet, jo në profilin tim, se profili im është shtëpia ime dhe shqiptari e ka shtëpinë të shenjtë”, përfundon Ceno, duke e mbyllur reagimin me një mesazh të prerë: “Suussss.”
Reagimi i saj ka hapur një tjetër debat në rrjetet sociale, ku përplasja nuk lidhet më vetëm me qëndrimin ndaj protestës, por edhe me kufirin mes kritikës publike dhe ndërhyrjes në jetën private të personave që shprehin publikisht bindjet e tyre.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
