Rrjoll – Tensionet mes banorëve dhe investitorëve strategjikë në bregdetin shqiptar po përshkallëzohen. Sipas raportimit të agjencisë ndërkombëtare Reuters, rreth 200 protestues në zonën e Rrjollit kanë rrëzuar gardhet metalike dhe telat me gjemba që rrethonin një projekt turistik luksoz, duke shprehur zemërimin e tyre ndaj asaj që e konsiderojnë grabitje të pronave dhe shpërfillje të komunitetit lokal.
Ngjarja vjen në një moment kur në Shqipëri po shtohen kundërshtimet ndaj projekteve të mëdha turistike të ndërtuara në zona me rëndësi të veçantë mjedisore dhe natyrore. Banorët e Rrjollit, një zonë e njohur për plazhet ranore dhe pyjet me pisha në veriperëndim të vendit, pretendojnë se toka e tyre është sekuestruar pa kompensim të drejtë.
Me flamuj kombëtarë në duar dhe me thirrjet “Revolucion”, protestuesit shembën rrethimet e kantierit. Në vendngjarje pati edhe përplasje të vogla me policinë, por kjo e fundit nuk ndërhyri për të ndaluar largimin e gardheve.
“Protestat nuk do të ndalen derisa banorët e Rrjollit të kompensohen. Janë rreth 200 familje që pretendojnë se u është marrë toka”, deklaroi Zeke Nikollë Shullani, një nga pronarët që kundërshton projektin.
Resorti me pesë yje po ndërtohet nga një kompani shqiptare dhe ka marrë statusin e “Investitorit Strategjik” nga qeveria shqiptare. Pikërisht ky status është kthyer në objekt kritikash të shumta, pasi banorët pretendojnë se privilegjon interesat e investitorëve në dëm të të drejtave të pronarëve vendas.
“Çfarë po ndodh në këtë vend është çmenduri. Kërkuam që investitorët të vinin dhe të konsultoheshin me banorët, por ata refuzuan. Mendojnë se mund të marrin gjithë këtë pasuri pa pasoja”, deklaroi një tjetër banor, Nikolin Markpalaj.
Ngjarja e Rrjollit shihet nga shumë qytetarë si një sinjal alarmi për mënyrën se si po zhvillohet turizmi në Shqipëri. Ndërsa qeveria e paraqet ndërtimin e resorteve luksoze si motor zhvillimi ekonomik, komunitetet lokale po ngrenë pyetjen nëse ky zhvillim po ndërtohet mbi pronat, historinë dhe të drejtat e tyre.
Protesta e Rrjollit dëshmon se konflikti mes banorëve dhe projekteve të mëdha turistike nuk është më një çështje lokale, por po kthehet në një debat kombëtar mbi pronën, transparencën dhe të ardhmen e bregdetit shqiptar.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.