Nga Redaksia:
Zhvillime të reja kanë dalë nga mbledhja me dyer të mbyllura e Këshillit të Mandateve, e zhvilluar sot në Kryesinë e Kuvendit, ku u diskutua kërkesa e Prokurorisë së Posaçme kundër Korrupsionit dhe Krimit të Organizuar.
Sipas burimeve nga mbledhja, përfaqësues të prokurorisë deklaruan se në fazën fillestare të masave të kërkuara, znj. Belinda Balluku përballej me një rrezik dënimi deri në 10 vite burg.
Megjithatë, sipas prokurorëve, situata e saj ligjore është rënduar ndjeshëm. “Sot që flasim, me akuzat e ngritura nga prokuroria në këtë moment, znj. Balluku rrezikon deri në 35 vite burg,” mësohet të kenë deklaruar ata gjatë mbledhjes.
Mbledhja u zhvillua me dyer të mbyllura, ndërsa pritet që në vijim të ketë zhvillime të tjera lidhur me procedurat parlamentare dhe hetimore për këtë çështje.
Situata ka shkaktuar tronditje në skenën politike shqiptare, ndërsa publiku pret të mësojë nëse procedurat do të avancojnë drejt gjykimit dhe si do të ndikojë kjo në imazhin dhe të ardhmen politike të znj. Balluku.