TIRANË — Një kompani izraelite do të ndërtojë qendrën e parë të të dhënave (data center) në Shqipëri, në një projekt strategjik me vlerë rreth 100 milionë euro, raporton gazeta izraelite The Jerusalem Post, duke iu referuar burimeve të specializuara të sektorit të teknologjisë.
Sipas raportimit, kompania izraelite ADC është përzgjedhur për realizimin e këtij projekti madhor, i cili do të ndërtohet në një zonë të lirë ekonomike pranë kryeqytetit Tiranë. Qendra e të dhënave pritet të shërbejë si një nyje strategjike për përpunimin e avancuar të të dhënave dhe aplikacionet e inteligjencës artificiale.
Investimi fillestar parashikohet të jetë rreth 100 milionë euro, ndërsa kapaciteti energjetik i objektit do të nisë me rreth 32 megavat, me mundësi zgjerimi deri në 100 megavat në fazat e mëvonshme. Kjo e vendos projektin në nivel të lartë krahas qendrave moderne të të dhënave në rajon dhe më gjerë.
Raporti thekson se qendra do të përdorë teknologji të avancuara të përpunimit të të dhënave, përfshirë procesorë grafikë të fuqishëm të përshtatshëm për inteligjencën artificiale, cloud computing dhe analiza të mëdha të të dhënave.
Sipas The Jerusalem Post, ky projekt përfaqëson një hap të rëndësishëm për Shqipërinë në ndërtimin e infrastrukturës digjitale strategjike dhe rritjen e rolit të saj në hartën teknologjike të Europës Juglindore. Në të njëjtën kohë, ai forcon bashkëpunimin ekonomik dhe teknologjik mes Shqipërisë dhe Izraelit, veçanërisht në fushat e teknologjisë së lartë dhe sigurisë kibernetike.
Ndërtimi i kësaj qendre të të dhënave konsiderohet një zhvillim me ndikim afatgjatë, që mund të shndërrojë Shqipërinë në një pikë referimi për shërbimet digjitale dhe teknologjitë e avancuara në rajon.