Pas arrestimit të presidentit venezuelan Nicolás Maduro, Shtetet e Bashkuara nuk parashikojnë veprime të mëtejshme ushtarake apo politike ndaj Venezuelës. Kështu ka deklaruar senatori republikan Mike Lee, duke iu referuar një bisede telefonike të zhvilluar me Sekretarin amerikan të Shtetit, Marco Rubio.
Sipas senatorit Lee, Rubio i ka konfirmuar personalisht se administrata amerikane nuk ka në plan ndërmarrjen e hapave të tjerë kundër Karakasit, tashmë që Maduro ndodhet në paraburgim në SHBA.
“Ai parashikon se nuk do të ketë veprime të mëtejshme në Venezuelë, tani që Maduro ndodhet në paraburgim në Shtetet e Bashkuara,” ka deklaruar Lee.
Senatori republikan theksoi se veprimet e forcave amerikane kishin një qëllim të kufizuar dhe specifik, duke sqaruar se sulmet u ndërmorën “për të mbrojtur dhe siguruar personelin që po zbatonte urdhrin e arrestimit”.
Megjithatë, më herët, vetë Mike Lee kishte shprehur shqetësime serioze mbi bazën kushtetuese të këtij operacioni. Në një postim në rrjetin social X, ai kishte ngritur pikëpyetje mbi legjitimitetin ligjor të veprimit amerikan:
“Pres të mësoj se çfarë, nëse ka diçka, e justifikon kushtetutshmërisht këtë veprim, në mungesë të një shpalljeje lufte ose autorizimi për përdorimin e forcës ushtarake.”
Deklaratat e senatorit Lee shtojnë debatet në Uashington mbi kufijtë kushtetues të përdorimit të forcës nga administrata amerikane, veçanërisht në operacione të drejtpërdrejta ndaj krerëve të shteteve të huaja.