Dr. Robert Malone shfaqet në një ekran ndërsa mban një deklaratë hapëse gjatë një takimi të Komitetit Këshillimor mbi Praktikat e Imunizimit (ACIP) për të diskutuar orarin e imunizimit të fëmijëve, në Qendrat për Kontrollin dhe Parandalimin e Sëmundjeve në Atlanta, Georgia, SHBA, më 5 dhjetor 2025.
Nga Redaksia:
Komiteti Këshillues për Praktikat e Imunizimit (ACIP) pranë Qendrave Amerikane për Kontrollin dhe Parandalimin e Sëmundjeve (CDC) ka votuar për të ndryshuar një nga udhëzimet më të hershme të vaksinimit në SHBA: heqjen e rekomandimit universal që çdo i porsalindur të marrë dozën e parë të vaksinës kundër hepatitit B brenda 12–24 orëve të para të jetës, kur nëna rezulton negative për këtë sëmundje.
Sipas udhëzimit të ri, në rastet kur nëna është negative për hepatit B, vendimi për të vaksinuar apo jo fëmijën në momentin e lindjes do të merret në mënyrë individuale nga familja dhe mjeku. Në situatat ku vaksina nuk jepet në lindje, skema e imunizimit do të nisë nga muaji i dytë i jetës.
Një votim me ndarje të theksuar
Vendimi nuk ishte unanim. Tetë anëtarë të komitetit votuan pro ndryshimit, ndërsa tre mjekë – Raymond Pollack, Cody Meissner dhe Joseph R. Hibbeln – u shprehën kundër. Përfaqësuesi i Medicare dhe Medicaid, Andrew Johnson, deklaroi se ky ndryshim nuk ndikon në mbulimin e kostove nga sigurimet shëndetësore, përfshirë Medicaid.
Rekomandimi për të vaksinuar menjëherë pas lindjes mbetet i pandryshuar në rastet kur nëna është pozitive për hepatit B ose kur statusi i saj nuk dihet, për shkak të rrezikut të lartë të transmetimit.
Reagimet pas vendimit
Mary Holland, drejtuese ekzekutive e Children’s Health Defense, e përshëndeti vendimin, duke theksuar se ai i rikthen familjeve të drejtën të vendosin së bashku me mjekun për këtë vaksinë. Sipas saj, diskutimi u zhvillua me transparencë dhe në përputhje me qëndrimet për më shumë hapje të administratës Kennedy.
Ndërkohë, doktoresha Monique Yohanan, eksperte e politikave të shëndetit pranë Independent Women, deklaroi se nuk ka ekzistuar ndonjëherë një bazë e fortë shkencore për vaksinim universal në një vend ku “99% e të porsalindurve nuk janë në rrezik”. Ajo vlerësoi se ndryshimi do të lejojë fokusimin e burimeve tek nënat që kanë nevojë reale për mbështetje, si ato që jetojnë me hepatit B, imigrante apo gra me histori përdorimi të drogës intravenoze.
Vendime të tjera nga komiteti
Komiteti votoi gjithashtu me 6 pro, 4 kundër dhe një abstenim që pas marrjes së dozës së parë, prindërit të konsultohen me mjekun për kryerjen e një testi serologjik për të verifikuar nivelet e antitrupave. Në të njëjtën kohë, u miratua një përditësim i financimit të programit Vaccines for Children (VFC), që synon ta përshtasë atë me rekomandimet e reja. Disa anëtarë abstenuan për shkak të paqartësive mbi ndikimin buxhetor të ndryshimeve.
Një vendim i vonuar disa herë
Ky votim ishte planifikuar fillimisht në shtator, por u shty për t’i dhënë mundësi grupit të punës të paraqiste më shumë të dhëna dhe analiza shtesë. Vendimi final u shty edhe një ditë më shumë për të rishikuar formulimin përfundimtar të rekomandimit.
Në fund të seancës, Dr. Robert Malone nënvizoi rëndësinë e bazimit tek të dhënat, pavarësisht interpretimeve të ndryshme: “Ne mund të kemi dallime në interpretim, por ekzistojnë të dhëna bazë që duhet të udhëheqin mendimin dhe vendimmarrjen. Ato nuk mund të hidhen poshtë.”