Nga Redaksia:
Organizata Ndërkombëtare Detare (IMO) kishte planifikuar të vendoste tarifa për pronarët e anijeve, me qëllim nxitjen e investimeve në karburante dhe teknologji detare me karbon të ulët – një hap drejt objektivit të “emetimeve zero” deri në vitin 2050. Por votimi që do të mbahej këtë javë u shty për një vit, pas një fushate intensive lobimi nga Shtetet e Bashkuara, e cila përfshinte kërcënime me sanksione dhe masa ndëshkuese ndaj vendeve që mbështesnin planin.
Presidenti Donald Trump e cilësoi planin si një “taksë të gjelbër globale”, duke deklaruar prerë se SHBA nuk do të bëhej pjesë e saj “në asnjë mënyrë, formë apo trajtë”.
Ndërkohë, sekretari Marco Rubio vuri në dukje se administrata Trump demaskoi dështimet e skemës së propozuar, duke e quajtur atë një taksë regresive që do të dëmtonte konsumatorët amerikanë. Ai theksoi se plani i IMO-së, i cili pritej të siguronte miliarda dollarë çdo vit, mungonte në detaje të qarta për zbatimin dhe mbikëqyrjen, duke ngritur dyshime serioze mbi efikasitetin dhe transparencën e tij.
Shtyrja e votimit përbën një goditje të fortë për një nga nismat më ambicioze të klimës në sektorin detar, duke nxjerrë në pah rolin vendimtar të SHBA-së në përcaktimin e politikave mjedisore globale.
Në një postim në platformën “X”, Rubio ndau artikullin e tij për Wall Street Journal, duke shkruar:
“Kur @POTUS premtoi të vendoste Amerikën në vend të parë, elitat globale e quajtën të rrezikshëm. Por, siç doli, ajo që ata vërtet kishin frikë ishte se ai do të bashkonte kombet e botës për të refuzuar skemat vetëshkatërruese të qeverisjes globale. Kjo është pikërisht ajo që ndodhi me taksën e karbonit të OKB-së.” /Përkthyer dhe përshtatur nga PatriotikMedia.al
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.