Nga Redaksia:
Ndërsa regjimi chavist në Venezuelë reagon me më shumë arrestime, shpërndarje milicianësh, ndalim të përdorimit të dronëve dhe fjalime që aludojnë për tradhti të brendshme, Shtëpia e Bardhë thekson se presidenti amerikan Donald Trump është “i përgatitur” për të “përdorur gjithë fuqinë e tij” me qëllim të ndalimit të hyrjes së drogës në SHBA dhe për të “nxjerrë para drejtësisë përgjegjësit”.
Paranoja e regjimit të Nicolás Maduro-s rritet ndërsa afrohet afati prej 36 orësh, kur sipas agjencisë Reuters pritet të mbërrijnë në brigjet venezueliane tre anije luftarake të Shteteve të Bashkuara. Ky zhvillim vjen pas urdhrit të presidentit Trump drejtuar Pentagonit për përdorimin e forcës ushtarake kundër karteleve të narkotrafikut në Amerikën Latine. Shtëpia e Bardhë paralajmëroi të martën se kreu i Shtëpisë së Bardhë është i gatshëm të “përdorë gjithë fuqinë amerikane” për të ndaluar hyrjen e drogës në SHBA, veçanërisht kur bëhet fjalë për një qeveri që “nuk është legjitime”.
Nga ana tjetër, diktatura chaviste reagoi me një paketë masash represive: më shumë arrestime, shpërndarje të milicëve, ndalim të dronëve dhe deklarata që nënvizojnë dyshimet për tradhti të brendshme.
Pas shpalljes së mobilizimit të 4,5 milionë milicëve (rezervistë pa trajnim ushtarak profesional), regjimi chavist publikoi në Gazetën Zyrtare Nr. 6.927 një rezolutë që ndalon për 30 ditë blerjen, shitjen dhe përdorimin e dronëve në territorin kombëtar. Paralelisht, regjimi shpalli arrestimin e dy personave të akuzuar për përgatitjen e një sulmi të supozuar me eksplozivë në Caracas, të cilin e lidhën me lideren e opozitës, María Corina Machado.
Arrestime, ndalim dronësh dhe frikë nga tradhtitë
Njoftimi u bë nga ministri i Brendshëm dhe numri dy i regjimit, Diosdado Cabello, i cili deklaroi se autoritetet kishin sekuestruar “23 pushkë snajper të kalibrave të ndryshëm, dy çifte armësh gjahu, një armë automatike të tipit pushkë, municione të llojeve të ndryshme, shufra plumbi për prodhimin e plumbave dhe një pushkë kalibri .50”. Këto janë operacione të zakonshme që regjimi i përdor sa herë afrohen zgjedhje, protesta apo presione ndërkombëtare.
Në orët e fundit është vërejtur gjithashtu rritje e paranojës së brendshme për tradhti të mundshme. Pikërisht këtë synon edhe SHBA me rritjen e shpërblimit për kapjen e Maduro-s nga 25 në 50 milionë dollarë dhe me shpalljen e Kartelit të Diellit si organizatë terroriste transnacionale. Kjo strategji synon një përçarje të brendshme që do të rrëzonte regjimin.
“Ka shumë frikacakë të fshehur e të maskuar që nuk guxojnë të më thonë gjërat në sy”, deklaroi Maduro të hënën në mbrëmje, pa përmendur emra konkretë. Edhe pse nuk foli drejtpërdrejt për anijet luftarake amerikane në Karaibet e Jugut, ai paralajmëroi shpërndarjen e milicëve për “ta mbrojtur”.
Trump i vendosur kundër narkotrafikut
Nga Uashingtoni qëndrimi është i prerë. “Presidenti Trump ka qenë shumë i qartë dhe i qëndrueshëm: ai është i përgatitur të përdorë gjithë fuqinë e SHBA për të ndalur hyrjen e drogës në vendin tonë dhe për të sjellë para drejtësisë përgjegjësit”, deklaroi të martën sekretarja e Shtypit të Shtëpisë së Bardhë, Karoline Leavitt, kur u pyet nga një gazetar mbi nisjen e anijeve luftarake amerikane drejt brigjeve të Venezuelës, ku ndodhen 4.000 marinsë. Ajo kujtoi gjithashtu se “regjimi i Maduro-s nuk është qeveri legjitime e Venezuelës”.
Trump paralajmëron: SHBA gati për të përdorur gjithë fuqinë ushtarake kundër regjimit të Maduro-s dhe karteleve të drogës.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.
