By redaksia 
Nga Redaksia
Washington – Dhoma e Përfaqësuesve në Kongresin Amerikan ka hedhur poshtë përpjekjen më të fundit për të nisur procedurat e shkarkimit ndaj Presidentit Donald J. Trump, të iniciuar nga kongresmeni demokrat Al Green. Me 344 vota pro dhe vetëm 79 kundër, shumica dërrmuese e ligjvënësve, përfshirë edhe shumë demokratë, votuan kundër vazhdimit të kësaj nisme, duke e konsideruar atë të pabazë dhe të papërshtatshme në një moment ku Shtetet e Bashkuara janë në përballje serioze me kërcënime ndërkombëtare.
Rezoluta e Green e akuzonte Presidentin Trump për “abuzim pushteti” dhe për “përfshirje të njëanshme në luftë” pas sulmeve të fundit ajrore ndaj objektivave iraniane, por përpjekja e tij hasi rezistencë të fortë, jo vetëm nga republikanët, por edhe nga një pjesë e mirë e kampit të vet politik.
Nga 344 ligjvënës që votuan për të ndaluar procedurën, 128 ishin demokratë, ndërkohë që të gjithë republikanët rreshtuan krah Presidentit Trump, duke konfirmuar kontrollin e fuqishëm që ai ka mbi Kongresin aktual.
Kjo ishte hera e tretë që përfaqësuesi Al Green përpiqet të çojë përpara një impeachment ndaj Trumpit, por hera e parë që e bën këtë në mandatin e tij të dytë presidencial. Sipas Green, sulmet ndaj Iranit janë bërë pa autorizimin e Kongresit dhe përbëjnë shkelje të rënda të ligjit kushtetues amerikan.
Por për shumë ligjvënës, përfshirë demokratë me ndikim, këto akuza ishin më shumë politike sesa ligjore. “Ky është një moment kur Amerika duhet të tregojë unitet përballë Iranit dhe kërcënimeve globale, jo të sulmojë Presidentin e vet,” tha një prej tyre në seancë.
Përkrahësit e Trumpit e konsiderojnë këtë votë një tjetër fitore të madhe për Presidentin, i cili vazhdon të gëzojë mbështetje të fortë në bazën e tij dhe në institucionet kryesore të shtetit amerikan.
PatriotikMedia.al do të vijojë të ndjekë nga afër zhvillimet në Uashington dhe përplasjet gjeopolitike që kanë rikthyer në qendër të vëmendjes një SHBA të fortë, të vendosur dhe jo më të përkulur përballë akteve të agresionit apo diplomacisë së korruptuar ndërkombëtare.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.