Projektligji i ri për Bankën e Shqipërisë po ngjall debate. Guvernatori dhe zëvendësguvernatorët me imunitet procedural të posaçëm ndaj arrestimit
Nga Redaksia – Një projektligj i ri për funksionimin e Bankës së Shqipërisë pritet të hapë debat të gjerë publik dhe politik, pasi parashikon vendosjen e një mbrojtjeje procedurale të veçantë për drejtuesit më të lartë të bankës qendrore.
Sipas draftit, guvernatori dhe zëvendësguvernatorët nuk mund të arrestohen, t’u kufizohet liria, t’u ushtrohet kontroll personal apo kontroll i banesës pa një autorizim paraprak nga Gjykata Kushtetuese. Kjo do të thotë se çdo masë shtrënguese ndaj tyre do të duhet të kalojë fillimisht përmes filtrit të gjykatës më të lartë kushtetuese të vendit.
Përjashtim nga kjo procedurë do të ketë vetëm në rastet kur guvernatori ose zëvendësguvernatorët kapen në flagrancë ose ndiqen menjëherë pas kryerjes së një vepre penale. Në të gjitha rastet e tjera, organet e drejtësisë do të jenë të detyruara të kërkojnë autorizimin e Gjykatës Kushtetuese përpara se të ndërmarrin masa kufizuese ndaj tyre.
Projektligji parashikon gjithashtu se Gjykata Kushtetuese duhet të shqyrtojë kërkesën për autorizim brenda dy javëve nga depozitimi. Nëse brenda këtij afati nuk merret një vendim, kërkesa konsiderohet automatikisht e refuzuar.
Sipas relacionit të draftit, këto dispozita synojnë të garantojnë pavarësinë institucionale të Bankës së Shqipërisë dhe të shmangin ndërhyrjet që mund të cenojnë ushtrimin e funksioneve të saj. Megjithatë, kritikët mund ta shohin këtë si një zgjerim të imunitetit procedural për drejtuesit e një institucioni kyç financiar, duke ngritur pikëpyetje mbi balancën mes pavarësisë institucionale dhe përgjegjësisë përballë ligjit.
Projektligji është pjesë e paketës së re ligjore që synon të riorganizojë funksionimin e Bankës së Shqipërisë, duke përcaktuar më qartë statusin juridik, kompetencat dhe garancitë procedurale të guvernatorit dhe zëvendësguvernatorëve në rastet kur ndaj tyre zhvillohen hetime penale.
Nëse miratohet nga Kuvendi, kjo skemë do të krijojë një procedurë të re ligjore, ku çdo veprim penal ndaj drejtuesve të Bankës së Shqipërisë do të kushtëzohet nga miratimi paraprak i Gjykatës Kushtetuese, me përjashtim të rasteve të flagrancës.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
