Nga Redaksia – Avokati Altin Goxhaj ka bërë një deklaratë të fortë publike, ku pretendon se prej 12 vitesh ka qenë objekt censure në mediat shqiptare për shkak të denoncimeve të tij mbi shpopullimin e vendit dhe grabitjen e pronave kombëtare.
Sipas Goxhajt, arsyeja e heshtjes mediatike ndaj tij lidhet me faktin se ai ka folur vazhdimisht për atë që e quan “Axhenda Soros e Shpopullimit”, ndërsa akuzon rrjete të lidhura me George Soros se kanë ndikuar në censurimin e zërave kritikë.
“Shqipëria po zbrazet, të gjitha pronat, si malet dhe bregdeti po grabiten. Shumë shpejt popullsia dhe vetë Shqipëria do zëvendësohen”, deklaron ai.
Sipas avokatit, që prej 1 shtatorit të vitit 2014 ai është mbajtur larg ekraneve televizive pikërisht për të mos lejuar diskutimin publik mbi emigrimin masiv, shitjen e pronave strategjike dhe ndryshimet që ai i konsideron kërcënim për identitetin dhe të ardhmen e vendit.
Në reagimin e tij, Goxhaj thotë se sot realiteti i zbrazjes së Shqipërisë nuk mund të fshihet më, pasi sipas tij qytetarët e shohin çdo ditë largimin e të rinjve, boshatisjen e qyteteve dhe transformimin e pronave në zona bregdetare e malore.
Ai akuzon gjithashtu ata që, sipas tij, vazhdojnë të heshtin ose të censurojnë këtë fenomen, duke i cilësuar si njerëz që nuk mund të justifikohen më me frikë apo interesa personale.
“Nuk ka justifikim më për varrosjen e Shqipërisë”, shprehet ai, ndërsa kritikon ashpër klasën politike dhe një pjesë të shoqërisë që sipas tij kanë zgjedhur heshtjen përballë zhvillimeve që ai i konsideron dramatike për kombin.
Në fund të deklaratës së tij, avokati përdor një krahasim të fortë historik dhe emocional, duke thënë se shqiptarët po tregojnë më shumë sjellje përçarëse sesa frymë rezistence kombëtare.
Deklarata e Altin Goxhaj pritet të rikthejë debatet mbi censurën mediatike, emigrimin masiv, pronat strategjike dhe të ardhmen demografike të Shqipëria.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.