Nga Redaksia:
Administrata e presidentit Donald Trump shpalli këtë të mërkurë ngrirjen e 26 miliardë dollarëve të destinuara për programe në shtetet e drejtuara nga demokratët, në kuadër të mbylljes së tanishme të qeverisë federale. Nga këto, 18 miliardë dollarë ishin parashikuar për projekte transporti në Nju Jork dhe 8 miliardë dollarë për iniciativa të energjisë së gjelbër në 16 shtete, përfshirë Kaliforninë dhe Illinois.
Zëvendëspresidenti JD Vance paralajmëroi se, nëse paralizimi i qeverisë vazhdon, mund të ketë shkurtime më të mëdha të stafit në agjenci federale, me largime të përhershme nga puna, përveç atyre tashmë të shpallura.
Presidenti Trump mbrojti vendimin, duke theksuar në një postim në Truth Social se “mund të kursehen miliarda dollarë”. Sipas tij, kjo lëvizje synon të ushtrojë presion mbi Kongresin në negociatat mbi buxhetin federal prej 7 trilionë dollarësh.
Edhe një numër ligjvënësish republikanë i dhanë mbështetje strategjisë. Kreu i republikanëve në Senat, John Thune, deklaroi se zgjidhja është e thjeshtë: “Votoni për të rihapur qeverinë dhe problemi zhduket”. Megjithatë, disa senatorë, si Thom Tillis, shprehën shqetësim për ndikimin që kjo përplasje mund të ketë në negociatat me demokratët.
Pasojat e menjëhershme të mbylljes
Ky është mbyllja e 15-të e qeverisë amerikane që nga viti 1981. Ajo ka ndërprerë kërkime shkencore, programe të mbikëqyrjes financiare, punë për pastrimin e mjedisit dhe një sërë shërbimesh publike. Rreth 750.000 punonjës federalë janë dërguar në shtëpi pa punë, ndërsa të tjerë, si ushtarakët dhe agjentët kufitarë, po vazhdojnë shërbimin e tyre por pa pagesë përkohësisht.
Zyra e Patentave dhe Markave ka njoftuar se do të largojë nga puna 1% të 14.000 punonjësve të saj, ndërsa Departamenti i Çështjeve të Veteranëve ka konfirmuar se shërbimet e varrezave kombëtare do të vijojnë, por me kufizime në mirëmbajtjen dhe vendosjen e lapidarëve.
Një betejë që lidhet me zgjedhjet e 2026-ës
Të dyja palët politike po përpiqen të ia faturojnë njëra-tjetrës përgjegjësinë për mbylljen e qeverisë, në një kohë kur Shtetet e Bashkuara po hyjnë në fazën përgatitore të zgjedhjeve të vitit 2026, të cilat do të përcaktojnë kontrollin mbi Kongresin.
Republikanët akuzojnë demokratët se po bllokojnë marrëveshjet vetëm për t’i kundërvënë Trump-it, ndërsa demokratët kërkojnë garanci që presidenti do të respektojë ligjet e shpenzimeve që firmos.
Çështja kryesore mbetet 1,7 trilionë dollarë të destinuara për funksionimin e agjencive federale – një e katërta e shpenzimeve vjetore të SHBA-së – në një kohë kur borxhi kombëtar ka kaluar 37,5 trilionë dollarë.
Kjo përplasje kujton mbylljen rekord të viteve 2018–2019, gjithashtu nën administratën Trump, që zgjati 35 ditë. Këtë herë, beteja buxhetore nuk është vetëm mes republikanëve dhe demokratëve, por edhe një provë për të përcaktuar se deri ku do të arrijë Trump në drejtimin e financave federale për vitet që vijnë.
Ky material është pronë e Patriotikmedia.al dhe është i mbrojtur nga ligjet për të drejtën e autorit. Ndalohet riprodhimi, apo publikimi i plotë apo i pjesshëm i këtij materiali pa lejen e shkruar paraprakisht nga redaksia. Shkelësit do të përballen me pasojat ligjore sipas legjislacionit në fuqi.