Gabimi i madh i protestës: “Rama në burg, Berisha në burg” na përçau në vend që të na bashkonte
Nga Redi Minga:
Rama u dobësua vërtet në arenën ndërkombëtare, por jo në Shqipëri. Brenda vendit ai vazhdon të qeverisë, të marrë vendime dhe të bëjë çfarë të dojë, sepse askush nuk po e pengon realisht.
Dhe pikërisht këtu qëndron problemi.
Në vend që protesta të bashkonte shqiptarët kundër pushtetit, u zgjodh një formulë që solli përçarje: “Rama në burg, Berisha në burg”.
Duke vendosur Ramën dhe Berishën në të njëjtën parrullë, u krijua një konflikt i panevojshëm mes protestuesve dhe demokratëve. Në vend që presioni të drejtohej i gjithi tek qeveria që është sot në pushtet, protesta nisi të përplaset me një pjesë të qytetarëve që duan gjithashtu ndryshimin.
Nëse ke inat me Sali Berishën, dënoje me votë. Nëse nuk të pëlqen PD-ja, mos e voto. Por sot beteja kryesore është tjetër: të largohet Edi Rama dhe të ndryshojë sistemi që ka prodhuar këtë pushtet.
Dhe këtu lind një pyetje shumë e thjeshtë:
Nëse nuk i donit demokratët në protestë tek Kryeministria, pse nuk i latë të protestonin tek Parlamenti, meqë thoni se protesta juaj nuk është politike?
Nëse protesta është qytetare dhe jo politike, atëherë pse të përjashtohet një grup qytetarësh vetëm sepse kanë bindje politike ose kanë votuar një parti?
Kush e zotëron protestën?
Kush vendos kush mund të jetë pjesë e saj dhe kush jo?
Demokratët nuk janë pronarë të protestës, por as ju nuk jeni pronarë të saj.
Protesta është e qytetarëve.
Nëse qëllimi është ndryshimi, atëherë çdo shqiptar që kërkon ndryshim duhet të ketë vend aty: demokratë, socialistë të zhgënjyer, të rinj pa parti, njerëz që kanë votuar dhe njerëz që nuk kanë votuar kurrë.
“Do të bëjmë mosbindje civile” – çfarë mosbindjeje civile me 2 mijë veta në bulevard?
Këtu duhet folur pa eufemizma.
Dëgjojmë të thuhet: “Do të bëjmë mosbindje civile”.
Por çfarë mosbindjeje civile bëhet me rreth 2 mijë veta në bulevard?
Mosbindja civile nuk është thjesht një deklaratë në mikrofon. Nuk është vetëm të mblidhesh, të mbash fjalime dhe pastaj të largohesh.
Nëse flitet për mosbindje civile, atëherë duhet të shpjegohet qartë se cili është plani, çfarë veprimesh konkrete parashikohen dhe si synohet të ushtrohet presion real mbi institucionet.
Sepse një tubim dhe një mosbindje civile nuk janë e njëjta gjë.
Mosbindja civile kërkon pjesëmarrje të gjerë, organizim dhe veprime konkrete.
Nëse në bulevard janë vetëm rreth 2 mijë njerëz, atëherë duhet bërë pyetja: ku janë pjesa tjetër e shqiptarëve që thuhet se duan ndryshimin?
A mund të quhet kjo një lëvizje kombëtare?
A mund të quhet revolucion?
A mund të pretendohet se po bllokohet pushteti?
Këto janë pyetje që duhet t’i bëjë çdo protestues.
Dhe më e rëndësishmja: pse vazhdoni të protestoni natën?
Kur Rama dhe njerëzit e tij punojnë ditën, kur institucionet funksionojnë ditën, kur Parlamenti funksionon ditën dhe kur vendimet që prekin shqiptarët merren ditën, përse ky “revolucion” zhvillohet natën?
A është sepse tani është vapë?
Nëse pretendohet se kemi një revolucion qytetar, atëherë duhet të ketë veprime konkrete aty ku është pushteti dhe në oraret kur pushteti funksionon.
Protesta nuk bëhet vetëm me fjalime, parrulla dhe tubime simbolike.
Revolucioni nuk bëhet me fjalë. Bëhet me veprime konkrete.
Prandaj, nëse është bërë një gabim, kërkojuni falje demokratëve dhe bashkohuni me ta.
Jo sepse duhet të duam Sali Berishën.
Jo sepse duhet të duam PD-në.
Por sepse sot na intereson një gjë: të largohet Edi Rama.
Pastaj, pasi të largohet Rama, shqiptarët mund të vendosin me votë se kë duan dhe kë nuk duan.
Por sot nuk ka kuptim të harxhojmë energjinë duke u përplasur me njëri-tjetrin.
Sot beteja është të shporret Rama, jo të hahemi me njëri-tjetrin.
Mos bëni sikur jeni politikisht “virgjër”
Ka edhe një problem tjetër që duhet thënë hapur.
Shumë prej atyre që sot hidhen përpjetë duke thënë se protesta nuk është politike, kanë histori dhe lidhje me partitë në Shqipëri.
Në 35 vite, shqiptarët kanë qenë pjesë e PD-së, PS-së, LSI-së/PL-së, kanë kaluar nga një parti tek tjetra, janë larguar për shkak të bindjeve, interesave, zhgënjimeve, punës, posteve apo për arsye të tjera.
Dikush ka qenë demokrat.
Dikush socialist.
Dikush ka ndryshuar parti.
Dikush ka votuar një parti për vite dhe më pas është zhgënjyer.
Dikush është afruar me politikën për një punë, një post apo një interes.
Kjo është historia politike e Shqipërisë së këtyre 35 viteve.
Prandaj të dalësh sot dhe të thuash se “unë nuk kam pasur kurrë lidhje me politikën”, ndërkohë që ke një histori politike pas vetes, nuk e ndihmon protestën.
Nuk ka shqiptarë që duhet të marrin certifikatë pastërtie politike për të protestuar.
Lëreni protestën të bashkojë njerëzit
Lërini demokratët të jenë pjesë e protestës.
Por njëkohësisht mos kërkoni që demokratët të heqin dorë nga identiteti i tyre politik.
Asnjë prej jush nuk është pronar i protestës.
Një demokrat që del kundër Ramës nuk duhet të konsiderohet armik vetëm sepse është demokrat.
Një socialist i zhgënjyer që del kundër qeverisë nuk duhet të konsiderohet më pak qytetar.
Një i ri që nuk ka votuar kurrë nuk duhet të pyetet se nga cila parti vjen.
Të gjithë duhet të kenë vend.
Sepse përndryshe protesta mbetet një rreth i mbyllur që flet me veten.
Rama mund të bëjë edhe gabime të rënda politike, mund të marrë vendime që kundërshtohen nga qytetarët dhe mund të përballet me protesta, por për sa kohë që protesta nuk arrin të krijojë një front të gjerë qytetar, pushteti vazhdon.
Sot nuk na intereson Sali Berisha. Na intereson rënia e Ramës.
Dhe për Berishën do të vendosin demokratët dhe shqiptarët me votën e tyre.
Për PD-në do të vendosin votuesit.
Për çdo parti tjetër do të vendosin qytetarët.
Por askush nuk duhet ta përdorë pakënaqësinë ndaj Berishës për të larguar demokratët nga një protestë kundër qeverisë.
Boll me “Rama në burg, Berisha në burg”
Kjo parrullë na ka futur në një debat që nuk është beteja kryesore e momentit.
Boll jua futi Rama dhe Berisha me parrullën “Rama në burg, Berisha në burg”.
Sepse ndërsa qytetarët merren me njëri-tjetrin, pushteti vazhdon punën.
Prandaj duhet të kthehemi tek thelbi.
Rama në pushtet është problemi politik i sotëm.
Pastaj vjen dita e votës.
Pastaj secili shqiptar zgjedh vetë.
Por nuk mund të pretendojmë se duam të rrëzojmë një pushtet dhe në të njëjtën kohë të largojmë nga protesta njerëzit që duan të njëjtin ndryshim vetëm sepse kanë qenë ose janë demokratë.
Boll me tubime “Made in Europa”
Nëse duam një ndryshim real, Shqipërisë nuk i duhen vetëm tubime simbolike, fjalime dhe protesta që zhvillohen natën.
Duhet një lëvizje qytetare që të ketë pjesëmarrje të gjerë dhe objektiv të qartë.
Kërkojuni falje demokratëve. Bashkohuni me ta. Bashkohuni me çdo shqiptar që kërkon ndryshim.
Mos u merrni me njëri-tjetrin.
Mos e ktheni protestën në një luftë mes qytetarëve.
Sot beteja është kundër pushtetit të Ramës.
Pastaj, kur të vijë dita për të votuar, secili le të bëjë zgjedhjen e tij.
Koha nuk është e Ramës.
Koha nuk është e Berishës.
Koha është e shqiptarëve.
Dhe shqiptarët nuk kanë nevojë për njëri-tjetrin si armiq.
Kanë nevojë të bashkohen rreth asaj që i bashkon.
Boll me tubime “Made in Europa”. Shqipëria ka nevojë për një reagim qytetar shqiptar, të bashkuar dhe me një qëllim të qartë.
© Copyright of PatriotikMedia.al
