Nga Redaksia – Në Shqipëri, jo rrallëherë ndodh që emra të përmendur në dosje hetimore apo të lidhur me akuza të rënda të shfaqen njëkohësisht si investitorë të suksesshëm, duke ngritur pikëpyetje mbi standardet e kontrollit institucional dhe mënyrën se si trajtohen nga opinioni publik.
Një nga këta emra është Artur Shehu, i cili në dokumente hetimore të autoriteteve belge është përmendur si person i lidhur me atë që është quajtur “Grupi Aruba”, një grup i dyshuar për trafik ndërkombëtar të kokainës nga Amerika Latine drejt Evropës. Emërtimi “Grupi Aruba” lidhet me një seri përgjimesh dhe takimesh të zhvilluara në ishullin Aruba, ku sipas hetimeve belge janë diskutuar edhe skema të dyshuara të pastrimit të parave përmes investimeve në Shqipëri.
Sipas të dhënave hetimore të publikuara në media, aktiviteti i dyshuar kriminal do të ishte zhvilluar kryesisht gjatë viteve 2017–2023, ndërsa investimet në sektorin e turizmit dhe ndërtimit janë intensifikuar gjatë periudhës 2021–2025.
Deri më tani nuk ka një vendim gjyqësor të formës së prerë që ta shpallë Artur Shehun fajtor për këto pretendime.
Megjithatë, ajo që është fakt dhe e dokumentuar është se në vendimin nr. 28, datë 16 mars 2022, të Këshillit Kombëtar të Territorit, të firmosur nga kryeministri Edi Rama, është miratuar zhvillimi i një projekti në pronën e Artur Shehut dhe subjektit të tij tregtar “Adhenis”. Projekti parashikon ndërtimin e një godine dykatëshe me funksion restoranti.
Veçantia e këtij projekti ka ngjallur debat publik, pasi godina po ndërtohet në një pozicion që shtrihet mbi det, një rast që shumë e konsiderojnë të paprecedentë në Shqipëri. Në dokumentacionin zyrtar përcaktohet se vetëm kufiri verior ka distancë nga prona fqinje, ndërsa kufijtë jugor, lindor dhe perëndimor rezultojnë me zero metra, për shkak se kufizohen me detin.
Punimet tashmë janë të dukshme. Skeleti i ndërtesës është ngritur mbi kolona të futura në bregdetin e Vlorës, ndërsa projekti është hartuar nga arkitekti belg Xaveer De Geyter në bashkëpunim me studion shqiptare “I Ri” sh.p.k.
Por debati nuk ndalet vetëm te leja e ndërtimit.
Pranë objektit në ndërtim, në zonën ku frekuentohen plazhet, evidentohet edhe një tub shkarkimi që, sipas raportimeve mediatike, derdh ujëra të ndotura nga Kompleksi Turistik “Kristal”, gjithashtu në pronësi të Artur Shehut. Nëse këto pretendime konfirmohen nga autoritetet kompetente, ato do të ngrejnë pikëpyetje serioze mbi mbrojtjen e mjedisit dhe funksionimin e institucioneve përgjegjëse për monitorimin e vijës bregdetare.
Klikoni mbi linke:
https://rumble.com/shorts/v7cqnra
Nga ana tjetër, mbetet e paqartë se si një investim me karakteristika kaq të veçanta ka marrë miratimet institucionale, ndërkohë që shumë projekte të tjera kanë hasur pengesa për kritere shumë më të vogla.
Pyetja që shtrohet është e thjeshtë: a po trajtohet Artur Shehu si një biznesmen i zakonshëm që investon në turizëm, apo institucionet duhet të japin përgjigje më të plota mbi dyshimet që kanë qarkulluar prej vitesh në dosjet ndërkombëtare?
Në një shtet ligjor, përgjigjen nuk duhet ta japin mediat dhe as propaganda politike, por drejtësia. Deri atëherë, çdo pretendim për përfshirje në veprimtari kriminale mbetet pjesë e hetimeve ose raportimeve publike dhe jo një fakt i provuar me vendim gjykate.
Ndërkohë, një fakt mbetet i dukshëm për këdo që viziton zonën: restoranti mbi det po ndërtohet, leja mban firmën e kryeministrit dhe debati publik rreth këtij investimi vazhdon të thellohet.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
