Nga Redaksia – Deklaratat e fundit të zyrtarëve më të lartë të sigurisë dhe mbrojtjes në Moskë tregojnë se Rusia po e sheh me dyshim në rritje afrimin e Pakistanit me Shtetet e Bashkuara të Amerikës dhe planet perëndimore për rikthim ushtarak në rajonin e Afganistanit. Për Kremlinin, çdo tentativë për rikthimin e infrastrukturës së NATO-s pranë kufijve strategjikë të Rusisë, Kinës dhe Iranit konsiderohet një kërcënim afatgjatë për stabilitetin euroaziatik.
Sekretari i Këshillit të Sigurisë së Rusisë, Sergey Shoigu, deklaroi gjatë një takimi të Organizatës së Bashkëpunimit të Shangait (SCO) se Moska e konsideron “të papranueshme” rikthimin e infrastrukturës ushtarake të vendeve të treta në Afganistan ose ndërtimin e bazave të reja ushtarake në shtetet fqinje.
Pak ditë më parë, ministri rus i Mbrojtjes Andrey Belousov paralajmëroi gjithashtu se Rusia po monitoron nga afër përpjekjet e fuqive “ekstra-rajonale” për të krijuar prani ushtarake dhe korridore logjistike në Azinë Qendrore.
Megjithëse në deklaratat publike nuk u përmend drejtpërdrejt Pakistani, mesazhi i Kremlinit duket i qartë: pa territorin dhe korridoret pakistaneze, Perëndimi do ta kishte pothuajse të pamundur rikthimin e strukturave të NATO-s në Afganistan dhe në republikave e Azisë Qendrore.
Në një artikull të publikuar më herët në gazetën shtetërore ruse “Rossiyskaya Gazeta”, Shoigu kishte paralajmëruar se shërbimet sekrete perëndimore po përdorin grupe ekstremiste për destabilizimin e rajonit. Sipas tij, pas largimit të NATO-s nga Afganistani, fuqitë perëndimore po kërkojnë mënyra për t’u rikthyer përmes rrugëve alternative.
Moska dyshon se militantë të lidhur me rrjete të kontrolluara nga Perëndimi po transferohen drejt Afganistanit me qëllim krijimin e “zonave kronike të destabilitetit” pranë kufijve rusë, kinezë dhe iranianë.
Në këtë lojë strategjike, Pakistani shihet si hallka më e rëndësishme logjistike. Pozicioni gjeografik i Islamabadit e bën atë portën kryesore për çdo operacion ushtarak ose logjistik që synon Afganistanin dhe Azinë Qendrore.
Analistët rusë besojnë se administrata amerikane mund të kërkojë rikthim gradual në Afganistan, sidomos nëse konflikti mes talebanëve dhe Pakistanit përshkallëzohet. Në Moskë ekziston bindja se çdo ndërhyrje e re amerikane do të përdorte Pakistanin si bazë furnizimi dhe koordinimi.
Rusia druhet se kjo mund të çojë në rikthimin e bazës së famshme amerikane në Bagram, një objektiv që është diskutuar publikisht edhe në qarqet politike amerikane.
Për Kremlinin, një zhvillim i tillë do të nënkuptonte jo vetëm rikthim të ndikimit amerikan në zemër të Euroazisë, por edhe rrethim strategjik të Rusisë nga jugu.
Megjithatë, pavarësisht dyshimeve, Rusia nuk po zgjedh përplasjen direkte me Pakistanin. Përkundrazi, sinjalet aktuale tregojnë se Kremlini po përpiqet ta afrojë Islamabadin në orbitën e vet strategjike, duke shpresuar se bashkëpunimi ekonomik dhe projektet rajonale do ta largojnë Pakistanin nga planet amerikane.
Vizita e pritshme në Moskë e kryeministrit pakistanez Shehbaz Sharif shihet si një moment i rëndësishëm për të testuar drejtimin e ri të marrëdhënieve ruso-pakistaneze.
Por në sfond mbetet një pyetje thelbësore: a mund t’i besojë realisht Rusia Pakistanit, një shteti që historikisht ka qenë aleat strategjik i SHBA-ve?
Një tjetër faktor i rëndësishëm është edhe reagimi i Indisë. India ka qenë tradicionalisht partneri më i afërt strategjik i Rusisë në Azi, dhe çdo afrimitet i tepërt mes Moskës dhe Islamabadit mund të krijojë tensione të reja në marrëdhëniet ruso-indiane.
Nëse Rusia vazhdon të ndërtojë ura me Pakistanin, New Delhi mund ta interpretojë këtë si një ndryshim të ekuilibrave tradicionalë në rajon.
Megjithatë, për momentin, Kremlini duket se po ndjek një strategji të dyfishtë: paralajmërim të heshtur ndaj Pakistanit dhe përpjekje për bashkëpunim, me shpresën se Islamabadi nuk do të shndërrohet në korridorin e ri ushtarak të NATO-s drejt Azisë Qendrore.