Nga Redaksia:
Ndërsa qytetarët e Vlorës përballen me një krizë elementare jetese, mungesën e ujit të pijshëm prej më shumë se tre ditësh, pushteti lokal dhe përfaqësuesit politikë të Rilindjes zgjodhën luksin dhe shfaqjen. Administrata e Bashkisë Vlorë, deputetë dhe vetë kryetarja e bashkisë po festonin me një mbrëmje gala, paradë mode, mish, verë dhe muzikë, brenda ambienteve të mbyllura, në një kohë kur qytetarët nuk kishin as minimumin jetik: ujin.
Ky kontrast i fortë mes luksit të pushtetit dhe nevojave bazike të popullit ishte shkëndija që ndezi revoltën.
Protestë spontane: bidona bosh dhe thirrje kundër qeverisë
Të revoltuar nga arroganca dhe indiferenca, banorët e Vlorës dolën në protestë spontane përpara Teatrit “Petro Marko”. Me bidona uji bosh në duar, ata shprehën simbolikisht mungesën që po i poshtëron çdo ditë. Thirrjet “Poshtë qeveria” dhe “Duam ujë” kumbuan fuqishëm, duke treguar se durimi kishte mbaruar.
Situata u përshkallëzua kur protestuesit çanë kordonin e policisë dhe u futën brenda sallës ku po zhvillohej mbrëmja gala, duke detyruar pezullimin e aktivitetit. Një akt revoltë qytetare që ekspozoi hapur shkëputjen totale të pushtetit nga realiteti.
Qetësi e rreme, arrestime reale
Pasi protesta u qetësua dhe qytetarët filluan të shpërndaheshin, policia ndërhyri duke nisur arrestimet e banorëve të Vlorës. Jo për zgjidhjen e problemit, jo për garantimin e ujit, por për ndëshkimin e atyre që guxuan të protestonin. Një skenar i njohur: fillimisht injorim, më pas represion.
Forcat e policisë u shtuan ndjeshëm përpara godinës së Teatrit “Petro Marko”, ndërsa autoritetet lokale vazhduan heshtjen. Uji mungon ende, por prangat nuk munguan.
Kur pushteti feston, populli ndëshkohet
Ngjarja në Vlorë është një pasqyrë e qartë e qeverisjes së Rilindjes: luks për pushtetin, varfëri dhe dhunë institucionale për qytetarët. Në një qytet me histori dhe dinjitet, qytetarët kërkojnë ujë dhe përballen me polici; pushteti pi verë dhe organizon gala.
PatriotikMedia.al do të vijojë të denoncojë këtë padrejtësi dhe të jetë zëri i qytetarëve që kërkojnë të drejtën më bazike për jetesë me dinjitet. Uji nuk është privilegj, është e drejtë.